Aiaraldeko Greba Batzordearen bidez, 24 orduko mobilizazio egunean murgilduta dago eskualdea. Euskal Herriko Eskubide Sozialen Kartaren deialdiari jarraiki, greba orokorra gauzatzen ari dira milaka herritar. Horren adierazle da saltoki eta lantoki ugari itxita egotea. Herriguneko komertzio gehienek itxita dituzte ateak. Ondorioz, grebaren eragina zabala ari da izaten Amurrion ere.
Goizean goizetik antzeman da protesta giroa: 5:15ean abiatu dira pikete informatiboak Laudion eta Amurrion. Industriagunetan egon dira nagusiki. Izan ere, bi herri nagusietara bideratu dituzte inguruetako herritarrak, deialdiak indartzeko helburuarekin.
Amurrion, greba giroa nagusi
Amurrion Inauxa, Tubacex, Megatech, Valvospain edota Castinox fabriketan jo dute atea, besteak beste. Hala, lanera joandako beharginei grebaren inguruko informazioa eman diete goizeko txanden aurretik. Megatechen barrikada bat jarri dute, Ertzaintza bertaratu eta kendu duen arte. 8:00etan, aldiz, Zaraobe Institutura mugitu dira gazteak. Ateak blokeatu dituzte, sare sozialetan azaldu dutenez.
Hezkuntza eredu duin baten aldeko greba ere badaelako, gazte eta ikasleok argi daukagu! pic.twitter.com/PZrJN6Yb7N
— Aiaraldeko Greba Batzordea (@AiaraldeaGreba) January 30, 2020
Ondoren, Amurrioko erdigunean barrena ibili dira grebalariak, bizitza, lan eta pentsio duinen aldeko aldarriak zabaltzen. Udala irekita zegoenez, Herritarren Arretarako Zerbitzuan Josune Irabien alkatearekin bilera eskatu dute segidan, baina ez dute lortu. Ertzaintzak hala eskatuta, beharginak informatzeko bi ordezkari hautatu behar izan ditu Amurrioko Greba Batzordeak udaletxean. Tentsioa nabaria izan arren ez da aparteko tirabirarik egon.
Joko aretoan ere egon dira protestak, makinak itzali dituztelarik. Hala, toki ugaritan itxi dituzte ateak greba deialdiarekin bat egiteko, grebalarien azalpenen ondotik: Castinoxen, Santander banketxean...
Castinox-eko langileak enpresatik txalo artean irteten, greba egitea erabaki ostean!#Amurrio#U30GrebaOrokorra pic.twitter.com/LWz20OGVGt
— Aiaraldeko Greba Batzordea (@AiaraldeaGreba) January 30, 2020
16:30ean izango da hurrengo ekintza Amurrion. 18:00etan izango da mobilizazio nagusia, Juan Urrutia plazatik, eta 20:00etan "antipoteo kalejira" egingo dute.
Aiaraldea komunikabideak greba aktiboa egingo du; nola langileek hala Kooperatiba Elkarteak bat egin baitute deialdiarekin. Hortaz, gaur, greba orokorraren inguruko nondik norakoak soilik plazaratuko dira webgune eta sare sozialetan, Aiaraldea Ekintzen Faktoriako langile guztiak greban baitaude.