Atzo atera zen Galder Barbado amurrioarra eta Aitor Zelaia gasteiztarraren epaiketako sententzia. Lau urteko espetxe zigorra ezarri die Auzitegi Nazionalak bi gazteei. Horrez gain, urte bateko zaintzapeko askatasuna eta 10 urteko inhabilitazioa izango dute, "lehergarriak egiteko elementuak gordetzea" leporatuta, " helburu terroristekin".
Abokatuek jakinarazi dute helegitea jarriko dutela. Gauzak hala, bi gazteak ez dira berehelakoan sartu beharko espetxera, Fiskaltzak ere ez duelako berehalako kartzelaratzea eskatu. Auzitegi Nazionaleko Apelazio Aretoan jarriko dute helegitea. Ondoren, epaia berretsiko balitz, Espainiako Auzitegi Gorenera eraman ahalko lukete kasua, eta Estrasburgora gero.
Larunbatean manifestazioak egingo dituzte Amurrion eta Gasteizen, ANkerkeriari Stop plataformak deituta
Bihar, bi mobilizazio
Ernaik elkarretaratzeak egingo ditu bihar 12:00etan Amurrioko Juan Urrutia enparantzan eta Laudioko Lamuza plazan. Azken asteetan mobilizazio ugari egin izan dira eskualdean Galder Barbadori eta Aitor Zelaiari elkartasuna adierazteko:
- Urtarrilaren 22an manifestazioa egin zuen ANkerkeriari Stop plataformak Amurrion
- Urtarrilaren 22 goizean Ikamak eta Ernaik elkarretaratzea deitu zuten epaiketa salatzeko
- Urtarrilaren 16an elkartasun ekimena antolatu zuten San Anton plazan Galder Barbadori babesa helarazteko
Eragile ugariren salaketa
Amurrioko Udalak adierazpen instituzionala atera zuen herriko gaztearen aurkako epaiketaren harira. Atzo, berriz, zenbait eragilek salatu zuten epaia sare sozialen bitartez. Oskar Matutek Madrilgo Kongresuan salatu zuen auzia, EH Bilduren hitzartzea baliatuta.
Ondorengoak dira, sare sozialetan auziaren harira adierazpen publikoak egin dituzten eragileak:
ANkerkeriari Stopen oharra
ANkerkeriari Stop plataformak oharra atera du sententzia baloratzeko. Ostegunerako -otsailak 4- agerraldia ere iragarri dute Gasteizen. Ildo beretik, larunbatean 2 manifestazio egingo dituztela jakinarazi dute, 18:00etan izango da Amurriokoa, eta ordu berean abiatuko da Gasteizkoa ere. Prentsaurrekoan emango dituzte xehetasunak, aurreratu dutenez.
