ERASO MATXISTA

20 bat urteko mutil talde baten eskutik jazarriak izan direla salatu dute bi neska gaztek

Izar Mendiguren Cosgaya 2022ko urt. 25a, 20:29
'Entzun gaitzatela' dinamikaren bidez jaso dute lekukotza. / Aiaraldea.eus

Beste eraso matxista kasu bat zabaldu du Amurrioko Otsemeak taldeak. 'Entzun gaitzatela' dinamikaren bidez jaso dute gertaeraren berri, eta erasoa jasan duenaren testigantza zabaldu dute.

Eraso matxista kasu berria salatu du Otsemeak taldeak. Hilabete batean jazotako bigarren eraso matxista da. 'Entzun gaitzatela' tresnaren bidez jaso dute testigantza: "Lagun bat etxeraino autoz laguntzen ari nintzen, eta gure atzean beste kotxe bat geratu zen. Nire laguna ibilgailutik jaitsi zenean, oihuka hasi ziren... 'Begiratu neska, ai neskatxa...' Ez ziren geratu laguna urdurituta etxeko atarira sartu zen arte; eta beste mutil batek 'hara, beste neska bat dago kotxean, e neska!' egin zuen oihu, oilartuta".

Erasoa jasan duten emakumeek aitortu dutenez, ahaldunduta egin zioten aurre: "Nire laguna atarira sartu zenean, biratu eta euren altueran jarri nintzen. Jada ez zeuden horren ahobero. 20 bat urte zituzten, eta parrandan ari ziren, gure kontura barrezka, kontuan hartu gabe zer nolako beldurra edo egoera ari zen nire laguna bizitzen". Erantsi dutenez, gazte horiek ez ziren jabetu euren jarreraz, ez zuten buruan "zer jasanarazten dioten etxera bakarrik doazen beste pertsona batzuei".

Otsemeak talde feministak sare sozialen bitartez partekatu du salaketa. "Beste eraso bat eskualdean! Nahikoa da! Nazkatuta gaude!", azpimarratu dute.

Hilabete batean bigarren erasoa

Urtarrilaren 5ean bortxaketa kasu bat salatu zuten, Urduñan. Adi Emakumeak elkarteak oharra plazaratu zuen ordukoan, erasotzailea ez babesteko dei eginez. Azken gertaera ere herri berdinean jazo da, Aiaraldea Komunikabideak jakin duenez.

Jendartea Amurrio

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide