Atzo gauean bi saltokitan, gutxienez, sartu ziren lapurrak Amurrion. Ertzaintzak argitu dio Aiaraldea Komunikabideari, momentuz, bi salaketa jaso dituela. Biak izan dira bortizkeria baliatutako lapurreten ondorioz eta poliziak azaldu du okindegi batean eta botika batean izan direla. Ikerketa abiatu dute jadanik.
Aiaraldea Komunikabidea okindegiarekin -La Vitoriana- jarri da harremanetan eta bere arduradunak adierazi dio, berez, lapurrek ez dutela ezer eraman: "Kaxoi bat eramaten saiatu dira, hor dirua gorde ohi dugulakoan, baina ez dute dirurik topatu".
Hori bai, dirua eskuratu ez badute ere, ezezagunek kalte nabariak eragin dituzte. "Kristalezkoa da atea eta guztiz txikitu dute. Osorik ordezkatu behar izan dugu. Ez da lehenengo aldia, duela lau hilabete ere gauza bera gertatu zen", esan du okindegiko arduradunak.
Ertzaintzak bi salaketa baino ez ditu jaso, baina La Vitorianako langileak aipatu du entzun duela beste saltoki batean ere lapurreta egon dela.
Laudion asteburuan
Duela egun gutxi, ostiralean, hain zuzen, Laudioko negozio ugaritan antzeko gertaerak jazo ziren. Martxoaren erdialdean, ordea, Aretako trastelekuetan sartu zirenk. Hala eta guztiz ere, gogoratu beharra dago Aiaraldean delituen tasa oso baxua dela, eta horrelako gertakariek oihartzun handia dutela ezohikoak direlako.