Kristalak eta ateak hautsita esnatu dira Laudioko hainbat komertzio eta trasteleku, gaur gauean jazotako lapurreta oldearen ondorioz. Ertzaintzak hiru salaketa jaso ditu honezkero.
Hain zuzen ere, Zumalakarregi etorbideko Iza okindegian, Aldai plazako Txango tabernan eta Ugarteko hainbat trastelekutan gertatutako lapurreten berri jaso du poliziak.
Lekukoen arabera, udalerriko zonalde gehiagotan ere gertatu dira lapurretak; Aretako komertzioren batean eta Latiorro auzoko trasteleku batzuetan, esaterako. "Litekeena da egun honetan salaketa gehiago jasotzea" adierazi du Ertzaintzaren prentsa bulegoak.
Aiaraldea Komunikabideak jakin duenez, Ugarteko kioskoan eta Zumalakarregi etorbideko auto batean ere lapurreta saiakerak egon dira.
Poliziak ikerketa abiatu du, baina jakinarazi dute oraindik ez dela atxiloketarik gertatu. "Kasu guztietan indarrez sartu dira lapurrak, eta kalte material handiak eragin dituzte" azaldu du Ertzaintzak.
Lapurreta gehiago
Duela 10 egun, martxoaren 16an, Aretako urbanizazio bateko 20 trastelekutan lapurtu zuten. Azken hilabeteetan, ordea, kasu gehiago egon dira: Otsailean Jose Arrue kaleko sei trastelekutan lapurtu zuten, eta herriko zenbait establezimenduren aurkako ekintza bandalikoak gertatu dira ere.
Argazkiak: Iza okindegia