Aretako Patricia Bilbao urbanizazioko hainbat trastelekutan sartu dira lapurtzera gaur gauean. “20 trasteleku inguru dira, baina zifra zehatza ez dugu jakingo jabe guztiek salaketa jarri arte”, adierazi dio Ertzaintzak Aiaraldea Komunikabideari. Gertatutakoa ikertzen ari dira dagoeneko.
Lekukoek azaldu dutenez, hainbat etxebizitza bloke ditu urbanizazioak, eta horietako bitan gutxienez lapurtu dute. Horrez gain, auto batean ere sartu direla aipatu dute.
Aurrekariak
Azken hilabeteetan antzeko beste lapurreta batzuk egon dira inguruan. Otsailean Jose Arrue kaleko sei trastelekutan lapurtu zuten. Ildo beretik, azken asteetan zenbait ekintza bandaliko egin dira Laudioko establezimendu batzuen aurka.
Iazko uztailean, aldiz, Elizalde kaleko estankoko erakusleihoa hautsi zuten. Hurrengo hilabetean Santamaria harategian eta Laudioko Udal Igerilekuetan ostu zuten.
Amurrion, aldiz, poliziak pertsona bat atxilotu zuen azaroan, gozoki denda batean lapurreta saiakera egitea egotzita. Abenduan bi pertsona atzeman zituen poliziak. Lehena Urduñan, okindegi batean lapurtzea leporatuta. Bigarrena 18 urteko gaztea izan zen, eta Laudion atxilotu zuten hainbat jende jipoitzeagatik eta lapurretagatik.
Hala ere, egoera ez da larritzeko modukoa. Ertzaintzaren datuen arabera, Aiaraldea da EAEko kriminalitate tasarik baxuenetarikoa duen eskualdea. Hemen ikusi daiteke gaiari buruz Aiaraldea Komunikabideak 2018an eginiko erreportajea.
