Gaur, bihar eta astelehenean Tubos Reunidos enpresako langileek hitzordu garrantzitsua dute. Izan ere, urtebetez baino gehiago negoziatu ondoren, enpresa batzordeko gehiengoak (CCOOk, UGTk eta LABek) eta zuzendaritzak aurreakordioa prestatu dute, beharginek babestu edo baztertu dezaten.
'Hotzaren gelan' eta botikinean egongo da aukera bozkatzeko hiru egun hauetan 05:00etik 06:30ak arte eta 13:00etik 15:00ak bitartean.
Negoziazioa enpresa eta alde sozialaren artean oso luzea eta gogorra izan da eta egin diren aurrera pauso guztiek ez dute adostasun osoa lortu beharginen artean. Iaz langileek ez zuten babestu sindikatu gehienek adostutako beste aurreakordio bat eta mobilizazioekin jarraitu zuten.
Aurreakordio hau bozketara eraman baino lehen, beharginak deituak egon ziren beste dokumentu bat bozkatzeko eta ezezkoa gailendu bazen ere, ez zen izan loteslea, langileen kolektiboaren gehiengoaren bozak behar baitira erabakiak hartzeko.
Hala ere, enpresa batzordeak aintzat hartu zituen emaitzak eta zuzendaritzak zenbait aldaketa egin ditu bere proposamenean (besteak beste, langileen postuen arteko mugikortasunari dagokionez).
Aurrekari horiekin, galdeketaren emaitzak ez daude argi eta ELAk eta ESKk aurreakordioaren kontra egin dute.