Tubos Reunidos konpainiako langile batzordeak -ELAk, CCOOk, UGTk, LABek eta ESKk osatuta- mobilizazioa deitu du martxoaren 3rako, 13:00etik 15:00ak arte, bulegoen aurrean.
Elkarretaratzearen eta lanuztearen helburua izango da salatzea otsailaren 20an gertatutako istripu larria, zeinean PINE Instalaciones y Montajes enpresako langile batek zauri arinak izan zituen, baina beste batek gorputzaren %40 erre zuen.
Ezbeharra lan hitzarmenaren negoziazioaren eta bozketaren erdian harrapatu du enpresa batzordea eta horregatik atzeratu da mobilizazioa.
Izan ere, gaur da azken eguna beharginentzat lan hitzarmenaren aurreakordioari buruz bozkatzeko.
Edonola ere, enpresako ESKko eta CNTko sail sindikalek oharrak plazaratu dituzte istripuari buruz hausnartzeko eta biek nabarmendu dute ez dela kasualitatea ezbeharrak eta arriskuak ugariagoak izatea azpikontratatutako langileen artean.
Bi erakundeek salatu dute azpikontraten prekarizazioa eta aldarrikatu dute PINE zein Montajes Jauregui edota SAMSIC konpainietako langile azpikontratatuen subrogazioa; hau da, behargin horiek Tubos Reunidoseko langileak izatera igarotzea.
Halaber, ESKk kritikatu du Tubos Reunidosek Dupont enpresa kontratatu izana segurtasuna eta prebentzioa hobetzeko, euren ustez burokrazia eta itxurakeria baino ez baita sustatzen horrekin.
Azkenik, ESKk gaineratu du mantenu saila gero eta gehiago ari dela geratzen azpikontraten eskuetan.