Tubos Reunidos enpresako lan hitzarmenak jarraitzen du bere ibilbide nekeza. Izan ere, pasa den ostegunean eta ostiralean eta gaur bozkatu ostean, emaitzak ez dira argigarriak.
Berez, hiru egunetan 700 beharginek bozkatu dute:
- Botoak guztira: 700
- Bai: 396
- Ez: 296
- Zuri: 8
Ikus daiteke aukera babestuena aldekoa izan dela. Ordea, enpresako langile kopurua 839 da eta lan hitzarmenak aurrera egin dezan erabateko gehiengoak bozkatu behar du alde. Hau da, 24 boza falta izan dira onarpena posible egiteko. Parte hartzea handia izan da, %83,4, baina itunaren aldeko bozak %47an geratu dira.
Gauzak horrela, enpresa batzordeak aztertu beharko du zein izango den hurrengo urratsa.
Gertatutakoa ez da salbuespena izan indarrean dagoen negoziaketa prozesuan, oso luzea eta gogorra izan da hartu emana enpresa eta alde sozialaren artean eta egin diren aurrera pauso guztiek ez dute adostasun osoa lortu beharginen artean. Iaz langileek ez zuten babestu sindikatu gehienek adostutako beste aurreakordio bat eta mobilizazioekin jarraitu zuten.
Aurreakordio hau bozketara eraman baino lehen, beharginak deituak egon ziren beste dokumentu bat bozkatzeko eta ezezkoa gailendu bazen ere, ez zen izan loteslea, langileen kolektiboaren gehiengoaren bozak behar baitira erabakiak hartzeko.
Hala ere, Enpresa Batzordeak aintzat hartu zituen emaitzak eta zuzendaritzak zenbait aldaketa egin ditu bere proposamenean (besteak beste, langileen postuen arteko mugikortasunari dagokionez).