Atzo bildu ziren berriro Tubos Reunidos enpresako zuzendaritza eta sindikatuak, eta aurreakordioa onartu zuen langileen ordezkarien gehiengoak, hau da, UGTk, CCOOk eta LABek.
Bihar egingo dute batzar nagusia, proposamenaren nondik norakoak azaltzeko -baita ELAk eta ESKk ere, zeinek aurka bozkatu zuten-, eta ostegunean, ostiralean eta astelehenean bozkatzeari ekingo diote. Hiru egun horietan 05:30etik 06:30ak arte bozkatuko dute goizez eta 13:00etik 15:00ak arte eguerdian.
Urtarrileko aurreakordioa bertan behera geratu ostean, atzo lortutakoa bozkatuko dute aste honetan eta astelehenean
Enpresako zuzendariek adierazi zuten atzokoa zela egingo zuten azkenengo eskaintza eta otsailaren 14an sinatutakoari dagokionez, hiru aldaketa ekarri dituzte; gaueko plusak onartzea eta lan egiten den gau bakoitzeko zazpi minutuko librantza onartzea, lau ordura mugatuta. Horrez gain, aparteko ordainsariak dauden moduan uztea eta atzerapenak ekainean kobratzea, urrian egin ordez.
Galdeketa berria
Aste honetakoa ez da izango enpresako langileek bozkatuko duten lehen aurreakordioa. Izan ere, urtarrilean egin zuten beste bat. Kasu horretan, 396 langilek babestu zuten CCOO, UGT eta LAB sindikatuek aurkeztutako akordioa eta 296 beharginek kontra egin zuten. Edonola ere, langile kopuru erdiak ez zuenez bozkatu alde, onarpena bertan behera geratu zen.
Iaz ere lan hitzarmenaren zenbait blokek aurrera egin zuten bozketa bidez. adibidez, atzerapenen esparruan.
Beste proposamen batzuek ordea, atzera bota dituzte langileek eurek, iaz egin bezala.