ESK sindikatuak oharra zabaldu du adierazteko Tubos Reunidos enpresan ostiralean hasiko den lan-erregulazio espedientea iruzurra dela. Langile-erakundearen aburuz, neurri hori zilegia ez den moduan baliatuko du konpainiak, hau da, etekinak handitzeko.
ESK-k gogoratu du enpresak 54,5 milioi euroko mozkin garbia lortu duela 2023ko lehen sei hilabeteetan, 87 milioiko EBITDArekin, 333 milioiko negozio-zifrarekin eta %36ko hazkundearekin. Datu horien ondoren, enpresak 6 hilabeteko aldi baterako lan-erregulazioa ezarri du, lanaldiaren % 50eko gehieneko eraginarekin Amurrioko lantegian.
Konpainiak argudiatu du aurreikuspen txarrak daudela merkatuan eta sei hilabeteko tartea erabiliko du inbertsioak eta obrak egikaritzeko Amurrioko faktorian bertan.
Espedienterako oinarririk ez
Sindikatuaren aburuz, ez dago arrazoirik espedientea ezartzeko, eta 790 beharginen lanaldi murrizketak bilatzen duena da mozkinak handitzea, langileen eta bitarteko publikoen kalterako: "Plan horren ordaintzaileak langileak izango dira, soldaten murrizketekin eta langabezia-prestazioaren gastatzearekin, bai eta herritar guztiak ere, SEPEk egin beharko dituen ordainketekin".
Gogoratu beharra dago azken urteetan enpresan ezarriko den zortzigarren espedientea izango dela ostiralean honetan hasiko dena.
Kontraesanak
Halaber, ESK-k begien bistan dauden kontraesanak azpimarratu ditu. Alde batetik, enpresak espedientea negoziatzean eskaini dituen soldata gehigarriak: "Enpresaren egoera txarra balitz, ez zukeen soldata-osagarririk eskainiko trukerako txanpon gisa, sindikatuek aldi baterako lan-erregulazioa eta enpresak azaldutako arrazoiak onar zitzaten".
Bestetik, lana erregulatzeko neurriaren hirugarren hilabetean enpresak aurreikusi du altzairutegiko txandak handitzea: "Trapagarango lantegia ere lingotez hornitzeko gehikuntzak ekarriko duen ekoizpen-igoeraren ondorioz. Une horretatik aurrera, Amurrioko altzairutegia izango da lehengaiaren hornitzaile bakarra".
Erakunde publikoen jarrera
Azkenik, Administrazioaren jarduera ere kritikatu du sindikatuak. Izan ere, Tubos Reunidosek dirutza jaso du ICO eta SEPIren bitartez eta, langile-erakundearen iritziz, instituzio publikoak ez dira ari enpresaren portaera ikuskatzen.
Bide batez, ESK-k arbuiatu du Tubos Reunidos eta enpresa handien jokaera erakunde publikoei dagokienez, etengabe kritikatzen baitituzte eragile publikoen esku hartzeak, baina aukera duten bakoitzean diru publikoa eskatzen dute euren patrikak betetzeko, sindikatuaren aburuz.