Aiaraldea Kooperatiba Elkarteko Amurrioko bazkide talde batek eskaera tramitatu du bere herriko udaletxean, Txerra Molinuevo alkatea eurekin eta Aiaraldea Komunikabidearekin bildu dadin. Eskaeran azaldu dutenez, Amurrioko bazkideek "kezkaz eta arduraz" bizi izan dute Amurrioko Udalak Aiaraldea Komunikabidearekiko hartu duen jarrera, "12 urtez indarrean egon den dirulaguntza alde bakarrez eta aurretik inolako abisurik eman gabe kenduz eta komunikabideko kideekin biltzeari uko eginez".
Horregatik eskatu diote bilera Udalari, "auzi honi irtenbide bat bilatzeko lehenbiziko urrats moduan".
Urtebete dirulaguntzarik gabe
Maiatzean urtebete beteko da Amurrioko Udalak dirulaguntza kendu zionetik eskualdeko euskarazko komunikabide bakarrari. Hedabidearen aldeko elkartasun kanpaina abiatu zen orduan, eta 1.700 elkarte, eragile eta norbanako baino gehiagok (Amurrioko bertako 500 baino gehiago tartean) eskatu zioten tokiko erakundeari bere erabakian atzera egin eta euskararen biziberritzean "eragile aktibo" bilakatzea. Baina tokiko erakundeak ez zuen erantzun ere egin. Are gehiago, berriz uko egin zion komunikabidearekin biltze hutsari.
Aurten ere bere jarreran berretsi da tokiko erakundea, dirulaguntza aurrekontuetatik bigarren urtez jarraian ezabatuta. Hori salatzeko, Amurrioko bazkide talde bat aurrekontuen onarpeneko plenora bertaratu zen iragan urtarrilean, jarrera hori salatu eta “dialogo eta akordiorako bideak berrirekitzea” eskatzeko.