Villa Fe eraikinean duten espazioan igaro zuten igande goiza Amurrioko Emakumeon* Sareko kideek, ikasturteari amaiera emateko. Amurrioko genealogia feminista osatzeari ekin zioten bertan, herriko mugimendu feministak bere historian zehar izan dituen mugarriak denbora lerro batean kokatuz.
Motz geratu zitzaien dinamika. Azaldu dutenez, beste zita bat jarriko dute datorren ikasturterako, kronograma osatzen jarraitzeko. Parte hartzaileek hainbat garaitako kartel, eskuorri, pegatina zein bestelako materialak eraman zituzten dinamikara, eta Aiaraldeko Mugimendu Feministaren genealogia ezagutzeko aukera ere izan zuten, Bor Bor feminismo elkarteko Izar Mendigurenen eskutik.
Horren ostean, datorren ikasturtera begira jarri ziren sareko kideak. Irailetik aurrera antolatu nahi dituzten tailer, hitzaldi eta bestelako jarduerak zerrendatu eta lehentasunen arabera ordenatu zituzten.
2022ko martxoaren 8an aurkeztu zuten Amurrioko Emakumeon* Sarea. Amurrioko Mugimendu Feministak sustatu zuen taldearen sorrera, udalerriko beste sektore batzuekin elkarlanean. 2024ko amaieran inauguratu zuten lokala Villa Fe eraikinean.
Argazkiak: Amurrioko Emakumeon* Sarea