Amurrioko Emakumeon* Sareak jakinarazi duenez, bortxaketa bat salatzeko mobilizazioa egingo dute hilaren 6an, ostegunean, 19:00etan Juan Urrutia Plazan. Deialdiaren bidez argi utzi nahi izan dute ez dutela inolako eraso matxistarik onartuko, eta halako egoerarik bizi izan duenari Mugimendu Feministarekin harremanetan jartzeko deia luzatu diote: "Gure bizitzak daude jokoan. Autodefentsa feministarako deia egiten dugu. Saretuta gaude, erasoak salatzeko, seinalatzeko eta erantzuteko prest; antolakuntza feminista delako gure tresna. Erasoen berri izanez gero, Mugimendu Feministara jotzeko deia egiten dugu, erantzun kolektiboak artikulatzeko".
Ardura hartze eta posizionatzerako deia
Testuinguru horretan kokatu dute ostegun honetako mobilizazioa ere. "Sistematikoki ematen diren erasoen aurrean, ardurak hartzea eta posizionatzea guztion ardura da", azpimarratu dute, "konponbidea ez bazara, arazoa zara. Denok dugu erasotua izan den lagunen bat, baina inork ez dauka lagun erasotzailerik. Kontuek ez dute ematen".
Zentzu horretan, "jendartearen konplizitatea eta instituzioen pasibotasuna" aldatzeko beharra mahaigaineratu du Amurrioko Emakumeon* Sareak: "Indarkeria matxistei aurre egiteko lehen mailako arazo sozial eta politikotzat hartua izatea eskatzen dugu".
View this post on Instagram
Amurrioko salaketa ez da eskualdean aurtengo lehenbizikoa. Urduñan, esaterako, maiatzean beste eraso bat salatu zuten. Amurrion ere bi emakume jazarriak izan zirela salatu zuten ekainean.