Ane Ramos Izaga patinatzaile amurrioarrak denboraldiari amaiera ezin hobea eman dio, Espainiako U19 Vert Txapelketa irabazita. Ramos Izagak Espainiako Txapelketako denboraldiko hiru probetan garaipena lortu du, Montmelon, Cambrilsen eta Lloret de Maren, eta emaitza horiei esker txapelketa nazionaleko titulua eskuratu du.
Denboraldi osoan erakutsitako erregulartasuna eta lehiakortasun maila izan dira bere garaipenaren gakoetako batzuk. Gainera, U19 kategorian ez ezik, kategoria absolutuan ere lehiatu da, adin eta esperientzia handiagoko patinatzaileen aurka emaitza nabarmenak lortuz.
Horren erakusgarri da Big Air modalitatean kategoria absolutuko txapeldun izatea. Izagak azpimarratu duenez, “garaipen horrek garrantzi berezia du, maila nagusiko lehian lortu duelako, kategoria altuagoko patinatzaileen aurka”.
Denboraldian zehar nazioarteko lehietan neurtu ditu indarrak ere. Maiatzean Estrasburgon, (Frantzia) jokatutako txapelketan bosgarren amaitu zuen kategoria absolutuan, besteak beste Japoniako eta Suitzako patinatzaileen aurka lehiatu ostean. Katalunian ere maila berean gailendu zen, eta Euskal Herrian, berriz, parte hartu duen modalitate guztietan Euskadiko txapeldun izatea lortu du.
Urteak aurrera egin ahala, emaitzak pilatuz joan dira, Madrilgo U19 Park Txapelketako proba batean ere garaipena eskuratu zuen, eta denboraldiaren amaieran beste titulu garrantzitsu bat gehitu du: Espainiako Half Pipe Txapelketakoa. Horrekin, modalitate ezberdinetan lehiatzeko eta maila onean aritzeko gai dela berriro erakutsi du.
“Garaipen horrek garrantzi berezia du, maila nagusiko lehian lortu duelako, kategoria altuagoko patinatzaileen aurka”
Emaitza horien guztien atzean entrenamendua, esfortzua, konstantzia eta dedikazioa daude. Aurretik ibilbide luzea badu ere, azken denboraldietako emaitzek pauso sendoak ematen ari dituela erakusten du, bai U19 kategorian, bai kategoria absolutuan eta nazioarteko lehiaketetan ere.
Etorkizunari begira, Anek duen helburu nagusietako bat Munduko Txapelketan parte hartzea da. Horretarako, lanean jarraitzen du bere maila hobetzeko eta munduko patinatzaile onenekin lehiatzeko aukera izateko.
Lana, ilusioa eta konstantzia konbinatuz, Ane Ramos Izagak bere kirol ibilbidea eraikitzen jarraitzen dabil, azken lorpenek irekitako ateak baliatuz.