Amurrioko Landako kaleko etxe okupatua husteari ekin diote gaur goizean, agindu judizial bati erantzunez. Berez, Udaltzaingoa izan da kaleratzea gauzatu duena, baina Ertzaintzaren Brigada Mugikorraren babesa izan du horretarako, eta kalea inguratu dute operazioa burutzeko.
Berez, iragan maiatzean saiatu zen tokiko polizia lehen aldiz etxea husten, eta ordutik hona prozedura judizialetan murgilduta egon da auzia.
Poliziak banan-banan identifikatu eta kanporatu ditu etxean zeuden pertsonak. Hala ere, bertaratu diren ordurako bizilagunetako batzuk jada ez zeuden barruan.
Aiaraldea Komunikabideak jakin izan duenez, hamabi lagun zeuden guztira eraikinean bizitzen, eta kale egoeran geratuko dira orain.
Honakoa ez da eskualdean egiten den mota honetako lehen operazioa. Uztailean beste etxe okupatu bat kanporatu zuen Ertzaintzak Luiaondon, kasu horretan 15 pertsona kalean utzita. Amurrion, aldiz, 8 pertsona kanporatu zituzten abuztu hasieran herriko anbulatorio zaharreko eraikinetik, bi aste eskaseko okupazioaren ostean.
