Datorren asteazkenean hasiko dira Arrankudiagako jaiak. Aurten ere, egitarau oparoa osatu dute udalak eta herri eragileek elkarlanean. Nekane Otxoa irakasle ohia izango da aurtengo omendua, Arrankudiagako eskolan egindako lanaren aitortza gisa.
Abuztuaren 14an, asteazkenez, hasiko dituzte jaiak; marmitako eta tortilla txapelketarekin. 20:15ean izango da txupinazoa, eta ondoren DJ Mariskal arduratuko da giroa piztuta mantentzeaz.
Ostegunean -abuztuak 15- Andra Mari eguna ospatuko dute. Hain zuzen, pilota partidak izango dira nagusi. Gauean, aldiz, Maider Zabalegi "Alaitz eta Maider" taldeko kide ohia bertaratuko da, bakarka plazaratutako diskoa aurkeztera.
Ostiralean -abuztuak 16- Gazte Egunak hartuko du lekukoa. 12:00etan graffiti tailerra egingo dute, eta eguerdian bertso bazkaria gaztetxean. Gizarte Etxeak, berriz, jubilatuentzat antolatuko du bazkaria. Edozelan ere, arratsaldean futbol partidak egongo dira; eta pintxopote musikatuaren ondotik DJ Adrian arituko da musika jartzen.
Larunbatean, ordea, haurrek hartuko dute herria. Batetik, Altxorraren Bila jokoa gidatuko du Matxinkorta taldeak eurentzat. Bestetik, umeen kalejirak berotuko du giroa lehenbizi, eta jolas parkea edukiko dute Garondon ondoren. Haurren bazkariaren ostean apar festa egongo da. Eguna amaitzeko, baina, udalekuetako argazki emanaldia izango dute frontoian, bizitako abenturen adierazle.
Igandean izango da Kofradia Eguna. Urtero bezala, bazkarian bilduko dira herritarrak. Kantaldia, txakolin dastatzea, "Gool" saioak eta Puro Relajoren emanaldia egongo dira, besteak beste.
Berakatz egunarekin amaituko dira festak, astelehenean. Tradizioari jarraiki, odoloste jana eskainiko dute herriko gune ezberdinetan; eta gaueko ordu txikiak arte luzatuko da gaua; Modus Operandi eta Garilak 26 musika taldeek joko baitute, besteak beste. 5:00etan, baina, "Berakatz zopa" banatuko dute; errepikatzeko gogo eta zapore onarekin bukatzeko jaiak.
