Arrankudiagako jaiek badute egitaraua. Abuztuaren 14an eta 15ean abiatuko dituzte festak, eta 19tik 22ra izango du segida. Andra Mari bezperan -abuztuak 14- arratsaldetik gauera luzatuko da egitaraua.Ohi legez, arratsaldeko 17:00etatik aurrera kamiseta banaketa, kalejira, marmitako lehiaketa eta tortilla txapelketa egingo dituzte Gizarte Etxearen inguruan. Egun horretan jaurtiko dute txupina, 20:15ean hain zuzen. Gauean, berriz, DJ Mariskal arituko da musika jartzen. Abuztuaren 15ean, aldiz, dianarekin esnatuko dute herria 10:00etan, eta meza nagusiaren ostean poteoa egingo dute dultzaineroek gidatuta. Arratsaldean, aldiz, herriko umeen pilota partidak izango dira nagusi, 19:00etatik aurrera frontoian. Iluntzeko antzerki emanaldiarekin bukatuko dute eguna, Trapu Zaharra konpainiaren eskutik, 20:30ean.
Bigarren txanpa
Bigarren txanpa ostiraletik astelehenera arte luzatuko da, hilaren 18tik 21era. Aurretik, abuztuaren 16an eta 17an Futbito eta Mihiluze lehiaketetako kanporaketak egingo dituzte Gaztetxean. Abuztuaren 18an ‘Gaurko eta atzoko gazte eguna’ antolatuko dute. Horretarako, meza, mahai jokoak, edadetuen bazkaria eta erromeria prestatu dituzte. Arratsaldean Futbito eta Mihiluze lehiaketen finalak jokatuko dituzte Gaztetxean. Gaztetxetik atera gabe kontzertuak egingo dituzte 21:30ean, Ostrich Wedding, Aizkolariak eta Arrakala taldeak taularatuz. Abuztuaren 19an, larunbatean, umeen eguna egingo dute. Hala, kalejira, jolas parkea eta haurren bazkaria izango dira protagonistak eguneko lehen zatian, eta 16:30ean apar festak hartuko dio lekukoa ekimenari. Horrez gain, bolo tiradak eta Xaiborren ikuskizuna egongo dira, baita kanpamentuko proiekzioa ere.
Abuztuaren 20an, berriz, txakolin dastaketa, euskal presoen aldeko elkarretaratzea eta Kofradia Eguneko bazkariak beteko dute plaza. Kanturako tartea ere gorde dute, Idoia eta Roberto abeslarien eskutik.
Abuztuaren 21ean bukatuko dira Arrankudiagako jaiak, Berakatz Egunarekin. Futbol eta pilota partidekin gozatuko dute arratsaldean. 20:30ean odoloste jana egingo dute. Gaupasaren ardura, aldiz, Moonshine Wagon eta Trikizio taldeek izango dute, 23:00etatik aurrera. 05:00etan, baina, berakatz zopa banatuko dute gautxorien artean.