Tortilla eta marmitako txapelketa, pilota partidak, bola jokoa, kofradia bazkaria, kanpamenduko proiekzioa... ohiko osagaiak izango dituzte Arrankudiagako Andra Mari jaiek aurten ere. “Ez dugu aldaketa askorik sartu, aurreko urteetako eskema mantendu dugu”, aitortu diote Jai Batzordeko kideek Aiaraldea Komunikabideari.
Hala ere, bi berrikuntza txiki egingo dituzte. Azaldu dutenez, Berakatz Egunean (aurten Gazteen Eguna ere izango dena) duela zenbait urte bazegoen kuadrillaka mozorrotzeko ohitura, eta hori berreskuratu nahi dute. Horrez gain, aurtengo kamisetak “ukitu berezia” izango duela ere aurreratu dute.
Berakatz Egunean mozorrotuta ateratzeko deia luzatu dute.
Guraso elkarteko kideak pregoilari
Festetako pregoilariak nortzuk izango diren ere zehaztu dute. Guraso elkarteko kideei eman diete horretarako aukera, “herrian parte hartze handia dutelako eta nahiko aktibo daudelako”.
Abuztuaren 14an irakurriko dute pregoia Gizarte Etxeko balkoitik, 20:15ean, eta jarraian piztuko dute jaiei hasiera emateko suziria. Ohikoan bezala, 18ra arte luzatuko dira ospakizunak, eta azken egun horretarako espero dituzte bisitari gehien. Urtero bezala, odoloste jana egingo dute herriko tabernetan, eta kontzertuekin luzatuko dute gaua, La Txamaren ‘corrido tumbao’-ekin, B.O.T.H.en punk-rockarekin eta Gora Herriaken erromeriarekin.
Parte hartze irekia
“Adin guztietako jendeak” parte hartzen du jai batzordean, bertako kideek nabarmendu dutenez: “17 eta 70 urte bitarteko bizilagunak daude, eta nahi duenak parte har dezake”.
EGITARAU OSOA
Abuztuak 14, osteguna: Bezpera, Atzoko gazteen eguna
12:00 // Meza
12:45 // Mahai jokoak
14:30 // Erretiratuen bazkaria Gizarte etxean
Ondoren bingoa
17:00 // Kamisetak banatzea
18:00 // Kalejira
18:00 // XXXVI. Marmitako Txapelketa
Izenak ematea: 18:00etatik 18:30era
19:30 // XXVII. Tortilla Txapelketa
Herriko 0 eta 18 urte arteko gaztetxoentzat
Izen-ematea 18:00etatik 18:30era
20:00 // Tortillen eta marmitako lapikoen aurkezpena
20:15 // Txupinazoa
23:00 // Diskoteka
Abuztuak 15, ostirala: Andra Mari
10:00 // Diana
11:00 // Meza nagusia
12:30 // Poteoa eta dultzaineroak
19:00 // Pilota partidak
20:30 // Kontzertua: Belar Hostoak
Abuztuak 16, larunbata: Umeen Eguna
11:30 // Umeen kalejira Garondotik Elexaldera
12:00 // Umeentzako jolas parkea Elexalden
14:30 // Umeen bazkaria Gizarte Etxean
Bazkarirako izenak emateko zerrendak jarriko dira. Apuntatzeko epea: abuztuaren 13a
16:30 // Aparra umeentzat, Garondon
17:30 // Boloak: Umeen tirada
18:30 // Boloak: Nagusien tirada, J.I. Larrazabalen IX. Oroimenezkoa
19:00 // Dantzatzeko prest!
21:30 // Kanpamentuko proiekzioa
Abuztuak 17, igandea: Kofradia eguna
10:30 // Diana
11:00 // Meza
12:00 // Erakusketa
13:00 // Kontzentrazioa: Denok batera presoak etxera!
14:00 // Umeen kofradia bazkaria
14:30 // Kofradia bazkaria, eliz atarian
16:00 // Kantuak, Joxe Mendizabalekin
20:00 // Dantzaldia: Tolin Mariatxia
Abuztuak 18, astelehena: Gazteen Eguna eta Berakatz Eguna
13:00 // Gaztepoteoa
15:00 // Gazteen bazkaria
Ondoren bingo musikatua
17:00 // Gazteen altxorraren bila
19:00 // Pilota partidak
21:30 // Odolosteak afaltzera herriko tabernetan
22:00 // Gaupasa: La Txama, B.O.T.H. eta Gora Herria
05:00 // "Berakatz zopa" eta jaien amaiera