Udako azken bi egunetan ospatuko dira Atxetako jaiak aurten, eta ohiko formula mantenduko dute. “Ez da aspertzerik egongo”, ziurtatu dute antolatzaileek. Aurreratu dutenez, “nagusi zein txikientzako ekintza mordo” dituzte prestatuta, familian disfrutatzeko. Izan ere, jai batzordeko kideen aburuz, “auzo lasaia eta familiarra” da Atxetakoa, eta bertako jaiak “plan polita” dira “kuadrillan biltzeko”.
Larunbatean (irailak 21) egun osoko egitaraua eskainiko dute, eguerditik hasita. Urtero bezala, marmitako eta tortilla txapelketa egingo dute, eta bertan jango dute gero kozinatutakoa. Haurrentzako jarduerak eta Erauntsi dantza taldearen emanaldia egongo dira arratsaldean, eta Rockyouren kontzertuarekin, parrilladarekin eta DJarekin piztuko dute gaueko giroa.
Igandean, aldiz, bazkari herrikoia eta igel txapelketa izango dira osagai nagusiak, eta Gorka Aginagalde bakarrizketatzailea arduratuko da festa umorez ixteaz.
Belaunaldi errelebo falta
Jai batzordeko kideak apirilean hasten dira festak antolatzen. “Egia esan, ez gara askotan biltzen antolatzeko, gehien bat WhatsApp bidez adosten ditugu gauzak”, azaldu dute, “proposamenak bota, aurrekontuak eskatu eta inkesta bidez bozkatu. Horrela ari gara egiten azken urtetan”.
Belaunaldi aldaketa beharra dagoela ere aitortu dute, ez dagoelako gazte berririk eta “gazteak izandakoak geroz eta nekatuago” daudelako. Gauzak hala, bizilagun guztiei luzatu diete antolakuntzan parte hartzeko gonbita.
EGITARAU OSOA
Irailak 20, larunbata
Goizean zehar baserriko produktuen salmenta
12:00 // Txupina
12:00 // Talo eta eguzkiloreen tailerra eta puzgarriak
13:00 // Marmitako eta tortilla txapelketa
14:30 // Sarien banaketa eta bazkaltzera
16:00 // Makillajea, puzgarriak
17:00 // Buruhandiak
17:30 // 'Euskal Jaia' umeentzako festa
18:30 // Txokolatada herrikoia
19:00 // Emanaldia eta dantza-plaza Erauntsi taldearekin
21:00 // Rockyouren kontzertua
21:00 // Parrillada herrioia
23:00 // FestaSound DJ
Irailaren 21a, igandea
14:30 // Bazkari herrikoia eta bingoa
18:00 // Gorka Aginagalderen bakarrizketa
19:00 // XXXIV. Igel Txapelketa
20:00 // Igelaren sari banaketa