Tradizioa beteta, San Martin jaiak ospatuko dituzte Zollon eta gaur izango da txupinazoa. Berez, gaurko eguna suziria jaurtitzeko balioko du, 22:00etan, baina egitarau luzeagoa aurreikusi dute hurrengo egunetarako.
Izan ere, bihar ez da ospakizunik egongo, antolatzaileek eurek azaldu dutenez, grebarekin bat egingo dutelako.
Ordea, ostiralean kontzertuak egongo dira. Lehenik eta behin Elortegi Anayek joko dute plazan, bertako tabernaren eskutik, eta gero Ez Dok Bapek hartuko du lekukoa 23:00etan, baina frontoian.
Larunbat eta igandea
Larunbatean egun osoa betetzeko jarduerak izango dituzte. Hasteko, 11:30etatik aurrera Kirikino Aisialdi Taldeak puzgarriak eta jolasak eramango ditu frontoira eta 13:00etan Etxebarria aita-seme trikitilarien unea helduko da.
20:00etan Arakis´s Groove Factory taldeak hartuko du plaza eta 23:00etan Hesituak eta Feos Pero Majosen eta Gautegun erromeriaren lana izango da gaua luzatzea.
Igandean 13:30ean Dunbots elektrotxarangak girotuko du Zollo eguerdian.
Azaroaren 21ean gehiago
Asteburua igarota ere ez dituzte ospakizunak etengo. Izan ere, hurrengo larunbatean, azaroaren 21ean, Sabaibaju Arrankudiaga-Zolloko pilota txapelketarekin abiatuko dute eguna.
15:00etan herri bazkariaz gozatuko dute Roberto, Idoia eta Miren trikitilarien soinuez lagunduta eta gaueko hamarretan amaituko dira aurtengo jaiak itxiera txupinazoa jaurtita.