Agility Pawer klub kantabriarrak Artziniega hautatu du bere udako agility proba antolatzeko. Asteburu honetan eta hurrengoan egingo da kirol proba, hilaren 21, 22, 23, 28, 29 eta 30ean, Barcenako kirol eremuan. Sarrera dohakoa izango da eta edonor bertaratu ahalko da probak ikustera, 14:00etatik aurrera ostiraletan eta 9:00etatik aurrera larunbat zein igandetan.
Parte hartze zabala aurreikusi dute, 350 txakur baitaude izena emanda, Espainiako Estatuko hainbat tokitatik zein nazioartetik (Frantziatik, Irlandatik edo Esloveniatik) bertaratutakoak ere.
Udalak jakinarazi duenez, futbol zelaia, kiroldegia, aparkalekua eta ikastetxea okupatuta egongo dira aipatutako egunetan. Izan ere, 60 karabana eta furgoneta baino gehiago espero dituzte.
Txakurrei bideratutako kirola da agilitya, eta hainbat oztopotako ibilbidea gainditzean datza. Artziniegakoa ez da izango eskualdean egiten den gisa honetako lehen proba. 2022an Okondon lehiatu zen Euskadiko Sextuple Agility txapelketa, eta 2016an Urduñan egin zen. Horrez gain, badaude kirol horretan adituak diren aiaraldearrak, Vicente Markinez laudioarra kasu.