Po! Po! Po! Pooo! Alde Hemendik!

Erabiltzailearen aurpegia Alde Hemendik mugimendua   Politika

Euskal Herri mailan abiatuko dugun ekimen baten berri eman nahi dugu. Espainiako eta Frantziako polizia, Guardia Zibil, jendarme eta orokorrean indar okupatzaileei beraietaz pentsatzen duguna ozenago esango diegu: Alde hemendik. Que se vayan. Barrez vous d'ici.

 Ez dugu perspektiba galdu behar. Europan herritar bakoitzeko polizia gehien sufritzen dugun herria gara Euskal Herria. Erabat onartezina da. Terrorismoaren aurkako borrokaren aitzakian, herri oso bat kontrolpean mantentzeko indar okupatzaileen egitura antolatu digute Euskal Herrian. Eta okerrena da, ez daukatela hemendik joateko inolako asmorik. Kontrakoa! 2014an, Eusko Jaurlaritzaren arabera, 3.214 kontrol egin zituen Guardia Zibilak EAEn bakarrik: eguneko 9 kontrol! Gehitu horri Ipar Euskal Herrian eta Nafarroan egiten dituzten guztiak!

 Herri gisa pairatu ditugun milaka eta milaka kontrolak, milaka atxilotuak, torturatuak, zaurituak, hildakoak... Ez genuke onartu behar. Ez ditugu ezertarako behar eta garai berriotan erabat justifika ezina da. Zapalkuntzaren ordezkari militarizatuak dira. Irlandan esan bezala: Time for peace, time to go.

 Horretarako kode berri bat mahai gainean jarriko dugu: autoarekin bozina lau aldiz jotzea, lau aldiz tutua, klaxona edo adarra, edo dena delakoa jo, al-de_he-men-dik edo beren hizkuntzetan que-se-va-yan eta ba-rrez-d'i-ci esateko. Irribarrea eragingo digun keinu txikia, ikusi bestela bideoa eta imajinatu praktika zabaltzea lortzen badugu eragingo diegun astindu etengabea. Eskratxe bozineroa egingo diegu, terminoa bataiatzeko ohorea dugunez!

 Erabilera masiboa bilatzeko tresna erraza izan nahi du. Kalean eta sarean mugitzeko. Mezua jaso behar duten horiei, oihua helaraziko dien modua. Kuartelen aurretik pasatzean, beren autoekin gurutzatzen garenean, beren boterea erakusteko kontroletan ilara luzeetan zain gauzkatenean... Egunero pasatzen gara ehunka eraikinen aurretik. Entzun behar dute. Joaten diren arte. Egunero. Etengabe.

 Amaiera data bakarra izan dezakeen kanpaina honekin borroka hau berrindartu nahi dugu, Euskal Herri mailako ekintza politiko bat abiatu, nazio mailako arazo estruktural bati berriz ere heldu behar diogulako. Politikoki duten rolagatik, herri honetan eragin duten min guztiagatik, eta herri aske bat eraikitzen ari garelako: alde hemendik!

 Badakite ez direla ongi etorriak. Izan dezatela presente. Grabatu bideoan eta sare sozialetan #AldeHemendik #QueSeVayan edo #Barrezdici etiketak erabiliz zabaldu. Apirilan zehar ostiral arratsaldeetan, aldarrikapen honekin bat egiten duten eragile, koadrila, familia, lantegileak deitu nahi ditugu antola daitezen eta bozina kolpe batzuk jotzera joan gaitezen gertuen duten Mordor gunera. Maiatzetik aurrera, herritar guztiok egunero jotzea izango da deialdia, baina bitartean ohitura sortu eta giroa berotu behar dugu kanpaina indartsu bat mahai gainean jarri nahi badugu.

 Ez gara geratuko borroka hau irabazten dugun arte!

 Bide batez, konturatu zarete zenbat silaba dituen Fuck the police esaerak?

Pio XII kalea Joxe Arregi deitzen da orain, torturatu guztien omenez

Erabiltzailearen aurpegia Alde Hemendik mugimendua   Politika

Torturaren Aurkako Eguna dugu gaurkoa.


Duela 35 urte, Joxe Arregi Euskal Herritarra, torturen eraginpean erail zuten Espainiar Poliziaren komisaldegi batean. 9 egun eman zituen Joxe Arregik inkomunikatuta. Bizitza galdu zuen ziega ilun artatik utzi zuen bere testigantzak gaur egun ere ohiartzuna du oraindik: "Oso latza izan da"


Oso latza izan da Torturaren errelatoa gure herrian. 5.000 tortura kasu baino gehiago erregistratu dira (horietatik 70 baino gehiago Aiaraldean), itzalpean geratu diren guztiak kontatu gabe. Mehatxuak, irainak, kolpeak, inkomunikazioa, erailketak.



Oso latza izan da, eta oso latza izanen da. Tortura ahalbidetzen duen erregimena zutik dirau oraindik. Indarrean diarduten salbuespen legeek gure herriko pasarte ilun hau iraunkortzen
jarraitzen dute.


Torturaren existentzia bera gaitzesteko batu gara gaurkoan. Non eta Pio XII kalean. Bai Espainiar Estatuan, bai Europa osoan zehar faxismoak eragindako sarraski guztien aurrean epeltasuna eta indiferentzia erakutsi zuen Aita Santua. Erregimen faxistak babestu zituen Aita Santua. Gaur salatu nahi ditugun tortura kasuak ahalbidetu zituzten erregimen faxisten babesle.


Guk, merezi duen duintasuna bueltau nahi diogu Joxe Arregiri eta tortura kasuen biktima izan diren Euskal Herritar orori. Gure herriaren oroimen kolektiboa mantendu eta oso latza dugun errelato hau ahazturan erori ez dadin duintasunez betetako kale berri bat daukagu Laudion.

Urriaren 12an... Alde Aiaraldetik!

Erabiltzailearen aurpegia Alde Hemendik mugimendua   Politika Atzerriko indar errepresiboen aurka urriaren 12an Laudion egingo den mobilizaziora deitzeko spota.

Tortura salatzeko Guardia Zibilaren aurrean ekintza egin dute

Erabiltzailearen aurpegia Alde Hemendik mugimendua Torturaren Aurkako Eguna dela eta, Aiaraldeko Alde Hemendik! mugimenduak torturaren salaketa publiko bat egin du Laudioko Guardia Zibilaren koartelaren aurrean.

Alde Hemendik mugimenduaren aurkezpena

Erabiltzailearen aurpegia Alde Hemendik mugimendua   Politika Aiaraldeko Alde Hemendik! mugimenduaren aurkezpen SPOTA