Akordiorik ezean, luzatu egingo dituzte Gasteizko aurrekontuak

Denbora agortzen ari zaio Gorka Urtaran Gasteizko alkateari. Hilaren 22an bozkatuko du Gasteizko udalbatzak datorren urteko aurrekontu proiektua, eta, ordurako EAJk eta PSEk PPren edo EH Bilduren babesa lortzen ez badute, luzatu egin beharko ditu aurtengo aurrekontuak. Atzo, lehen galbahea pasatu zuen aurrekontu proiektuak, EH Bilduk, Ahal Duguk eta Irabazik aurkeztutako osoko zuzenketa bateratua atzera bota baitzuten EAJk, PSEk eta PPk. Haatik, popularrek ohartarazi zuten ez dituztela Urtaranen aurrekontuak babestuko.

Oposizio guztia du aurka Urtaranen gobernuak. Talde bakar batek ere ez du begi onez ikusten 2018rako aurkeztutako aurrekontu proiektua. Hitzemandako akordioak ez betetzea, ekimenik ez izatea eta hiria «geldiune» batera eramatea leporatu diete EAJri eta PSEri. Atzo, osoko zuzenketen eztabaidan, «akordiorako borondaterik ez izatea» egotzi zioten, atzera, Urtarani. Udal gobernuak, berriz, «arduragabekeriaz» jokatzea leporatu zion oposizioari. Akordiorik ezean, bi aukera ditu Urtaranek: aurtengo aurrekontuak luzatzea, ala, konfiantza mozioaren bitartez, 2018koak aurrera ateratzea.

Arabako Foru Aldundian, berriz, akordioa lortu zuten ostegunean EAJk, PSEk eta PPk, eta atzo Ahal Dugu-k iragarri zuen osoko zuzenketa aurkeztuko diola proiektuari. Arabatik «kanpo» landutako akordioa izan dela salatu zuen Arantxa Abezia eledunak. EH Bilduk ere osoko zuzenketa aurkeztuko du. PPk, berriz, aurrekontuari «180 graduko bira» emateko 71 zatikako zuzenketa erregistratu zituen atzo. Abenduaren 27an bozkatuko dute aurrekontua.

Gipuzkoan, aurrera

Bestalde, Gipuzkoako Foru Aldundiko aurrekontuen tramitazioak aurrera jarraitzen du. Atzo, EH Bilduren eta Ahal Dugu-ren osoko zuzenketak atzera bota zituzten. Bi taldeok salatu zuten aurrekontuek izaera «neoliberala» dutela eta ez dutela balio gipuzkoarren beharrei erantzuna emateko.

Nafarroako Parlamentuan, berriz, hasi dira aurrekontu proiektuari jarritako zatikako zuzenketak eztabaidatzen. Guztira, 4.157 milioi euroko aurrekontua du foru gobernuak, eta talde guztiek aurkeztu dituzte zatikako zuzenketak. UPNk, esaterako, 200 inguru aurkeztu dizkio «herritarren beharrei hobeto erantzuteko», Javier Esparza eledunaren arabera. Geroa Baik, EH Bilduk, Ahal Dugu-k eta Ezkerrak ere aurkeztu dizkiote zuzenketak proiektuari, hainbat alorretako politikak hobetze aldera. Hilaren 21ean bozkatuko dituzte 2018ko aurrekontuak.