Astelehenean zendu zen Jose Antonio Tuesta laudioarra. Nafarra jaiotzez, Frankismo garaian iritsi zen Aiaraldera lan bila. Aceros de Llodion aritu zen behargin, eta makina bat herri mugimendutan aritu izan da ordutik hona.
Hainbat herritarrek zein eragilek goraipatu dute Tuestak bere bizitzan zehar eginiko lana. Laudioko EH Bilduk udalgintzan izandako jarduna nabarmendu du, besteak beste:
Tuesta zendu da.
— EH Bildu Laudio (@ehbildulaudio) 2019(e)ko maiatzaren 20(a)
Laudioko naparra, Nafarroako laudioarra. Gardea auzoko ordezkari sutsua. Ezker Abertzaleko zinegotzi ohia.
Osoko bilkura zein auzo batzarretan gogoan izango dugu.
Gugan bego.
Agur eta ohore, Tuesta! pic.twitter.com/zCZfO0jCdB
Jose Ignacio Alvaradok Aceros de Llodion bizitakoak ekarri ditu gogora, LABen delegatua izan baitzen Tuesta fabrika horretan. “Aceros de Llodio" enpresan ezagutu zintudanean 70eko hamarkadaren hasieran, ni ikasle hutsa nintzen, zu errepresio frankista itogarriaren aurkako ekintzetan buru-belarri sartita zeunden bitartean”, idatzi du Alvaradok bere iritzi gutunean.
Aitor Basterrak, aldiz, Gardeako auzokide gisa bizitako hainbat une kontatu ditu. “Ezin dut Tuestaz hitz egin Aceros eta zeramikan zein trenbidean bizitako enboskadak gogora ekarri gabe. Zelako garaiak haiek”.
Juanjo Basterrak, bere aldetik, Tuestak ASVIAMIE Aiaraldea taldean eginiko lana goraipatu du. “Beti zabaldu du mediku gune zehatz bat -Amiantoaren Institutua- bat sortzearen aldarria. Berak ondo zekien zer zen amiantoarekin gertatzen zena. Aceros de Llodion minbizia eragiten duen mineral horrekin egin zuen lan, eta baita beste substantzia batzuekin ere, eta kide ohiak ikusi zituen hiltzen”. Amiantoaren aurkako elkarteak ere oharra plazaratu du bere kidearen heriotzaren aurrean. Eragilearen aburuz, Tuestaren heriotza amiantoak eragina izan daiteke.