ELA sindikatuak afiliatuen artean zabaldu du komunikatua jakinarazteko Guardian enpresak enplegua erregulatzeko espedientea aurkeztuko duela bihar.
Zuzendaritzak azalduko du koronabirusaren pandemia dela eta eskaririk gabe geratu dela. Behin biltegiak bete dituztela auto zein float ataletan, ez dauka zentzurik konpainiarentzat lanean jarraitzea.
Horregatik, bihartik aurrera eta uztailaren 9ra arte ekoizpena etengo du enpresak. Espero dute apurka-apurka normaltasunera itzultzea ekainetik aurrera, baina momentuz inguruko zein naziorteko merkatuetan eskaririk gabe geratu dira.
Mantenuko langileak eta ekoizpen langile batzuk deitzeko aukera izango du enpresak beharren arabera, baina aurreikusten dute ekainera arte jarduerara ez dutela itzuli beharko. Gutxienez 24 ordu lehenago jakinaraziko zaie beharginei lan deialdia.
Horrez gain, langile batzordeak sinatutako akordioaren bidez, beharginek soldataren %80a jasoko dute, eta aparteko soldatak zein opor egunak mantenduko dituzte.
Dozenaka kutsatu enpresan
Langile batzordeko kide batek Aiaraldea Hedabideari aipatu dio 24 langile lotu dituztela zuzenean Covid-19 birusarekin, bai gaixorik daudela berretsi dutelako edo sintomak dituztelako. Gainera, beste 20 geratu behar izan dira euren etxeetan berrogeialdian.
Beharginak gaineratu du enpresak neurriak hartu zituela, baina kasuak agertzen ziren neurrian. Iturri berak gehitu du egun kutsatzeko aukera oso txikia dela, bakarrik 12 langile daudelako float labea mantentzeko. Hori bai, jende ugarik jarraitzen du telelanaren bitartez jarduten, etxetik.
