Ertzaintza xehetasun gehiago eman ditu atzo Laudion eginiko polizia operazioaren harira. 30 eta 28 urte dituzte atxilotutako gazteek, eta osasun publikoaren aurkako delitua egotzi diete.
Lamuza kaleko pisu batean burutu zen operazioa. Poliziak adierazi du kokaina kopuru “esanguratsua” topatu zuela bertan, substantzia hori moztu, pisatu eta banatzeko hainbat tresnarekin eta 9.000 eurorekin batera.
Ertzaintzak azaldu duenez, azken asteetan hainbat informazio jaso dituzte pisu horretan ohikoan drogarekin trafikatzen egon zitezkeela iradokitzen zutenak. Horregatik, zainketa lanak egiteari ekin zioten, eta modu horretan ikusi ahal izan zuten jende ugari gerturatzen zela etxebizitzara, auzokidea izan ez arren. Poliziaren arabera, batzuetan pisuaren barruan egoten ziren, eta eraikinaren atzeko aldean besteetan, eta bertako kideekin topaketa labur bat izan ostean “arrapaladan” joaten ziren. Hori ikusita, poliziak kalean gelditu zituen bisitarietako bi, eta soinean droga zeramatela konprobatu zuten horrela.
Epailearen esku utzi dituzte bi atxilotuak.
Hiru atxiloketa hilabete bakarrean
Azken hilabetean hiru atxiloketa jazo dira eskualdean drogarekin erlazionatuta, gaurkoa kontatuta. Ekainaren 25ean gizonezko bat atxilotu zuen Ertzaintzak Laudion 100 gramo anfetamina izatea egotzita. Uztailaren hasieran, aldiz, 3 lagun atxilotu zituzten Amurrion eta Ugaon drogak saltzea eta armak izatea egotzita.