Atzo Gometegui enpresak Eusko Jaurlaritzaren ordezkaritza zabala hartu zuen. Arantxa Tapia Ekonomiaren Garapen, Jasangarritasun eta Ingurumeneko sailburua, Javier Zarraonandia Industria sailburuordea eta Mikel Amundarain Industria eta Trantsizio Energetikoko zuzendaria egon ziren Laudioko lantegian.
Politikarien helburua izan zen enpresako zuzendaritzak hartutako norabidea babestea eta zabaltzea hedabidetan. Tapiak adierazi zuen jabetza berriak hurrengo erronkak hartu dituela: jarduerarekin jarraitzea eta merkatuen dibertsifikazioan eta eragiketa-bikaintasunean oinarritzen den hazkuntzako plan estrategiko handia abian jartzea.
Halaber, sailburuak adierazi zuen enpresak 6 milioi euroko inbertsioa egiteko eta 30 lagun kontratatzeko asmoa duela. "Egindako lanari esker, sektore eolikoko eta hidroelektrikoko eta meatzaritza-sektoreko nazioarteko bezero handien arreta ere erakarri dute, eta, hala, hazkuntza- eta hedapen-aldiari egin ahalko diote aurre datozen urteotan, aukera berri horiei erantzuteko. Gometegui Industrialek, gaur egun, 4 nabe estali dauzka, 10.000m2 baino gehiagoko azaleran, eta 200 tona arte altxatzeko gaitasuna", aipatu du Eusko Jaurlaritzak.
Edonola ere, Gometeguik garai latzak bizi izan ditu azken urteotan. Hartzekodunen lehiaketan egon zen eta, hori baino lehen, lan gatazkak ugaritu ziren enpresan.
