Urtearen amaierara arte luzatuko da Kulturlab 01 egitasmoa. Hainbat jarduera egingo dituzte datozen asteetan Lamuza parkean kokatuta itsas-edukiontzietan.
Orain arte Laudioko hiru sortzailek baliatu dute espazio hori euren lanak erakusteko: Ander Perez Puellesek, Nerea Apodakak eta Mederi Ferreñok.
Bihar (ostirala), aldiz, Leire Orueta, Aitziber Duarte, Belen Herrero eta Nerea Puenteren txanda izango da. Aulki baten lau hanka erakusketa plazaratuko dute lau sortzaileek. Ostiraletik igandera egongo da ikusgai, 18:00etatik 21:00etara.
Larunbatean bosgarren artista bat batuko zaie. Izan ere, Boniface Ofogo ipuin kontalaria ere bertaratuko da edukiontzietara. Dordokaren erritmoan ipuina kontatuko du, hiru aldiz, 18:30etatik aurrera.
Abenduko aurrerapena
Abenduan egingo dituzten ekintzen berri ere eman dute Kulturlab 01 egitasmoko kideek. Abenduaren 17tik 19ra Arantza Escondrillasen erakusketa ikusteko aukera egongo da parkean. La Familia Inventada taldeak, aldiz, Lambe Lambko Biofilia lana aurkeztuko du eta Leire Sanjurjo dantzariak dantza laborategia eskainiko du.
Horrez gain, hainbat mahainguru egingo dituzte, “Lamuza Parkeko kultur aukerei buruz hitz egiteko”. Hainbat laudioar esanguratsuk hartuko dute parte solasaldi horietan: Txani Rodriguezek, Juan Jose Ibarretxek, Izaskun Alonsok, Txema Urkijok eta Izar Mendigurenek, besteak beste.
Solasaldiak antolatuko dituzte Txani Rodriguez, Juan Jose Ibarretxe, Izaskun Alonso, Txema Urkijo eta Izar Mendigurenekin, besteak beste
Horrez gain, Kulturlaben olana erraldoia herritik zabaltzen jarraituko dute, Kulturkom kultur kongresuan ateratako ondorioak jendarteratzeko.
Kulturzaleak elkarteak antolatu du Kultulab 01 ekimena, helburu nagusi batekin: Lamuza Parkeak Laudioko Kultur garapenean bete dezakeen funtzioa jendarteratzea, “Kultur Sorkuntzarako Parke” bilakatu dadin etorkizunean. Zentzu horretan, elkarteko kideek nabarmendu dute “aukera garrantzitsuak” irekitzen ari direla herrian, baina egunerokoa “geroz eta zailagoa” dela, Kultur etxea itxia dagoelako, besteak beste.
Indide Out proiektua
Horrez gain, JR artista frantziarraren Inside Out nazioarteko dinamika artistikoan ere parte hartzen ari dira Kulturlab 01 ekimeneko kideak. Luisan Garcia argazkilari laudioarra ari da proiektua bideratzen. Laudioko kultur esparruko 100 lagunen erretratuak egingo ditu, “tokiko kulturaren mapa bisuala egiten hasteko eta Lamuza Kultur Parke bat sortzea aldarrikatzeko”.
