Etxebarria baserria bisitatzeko moduan egongo da urtea amaitu baino lehen. Hala iragarri du Laudioko Udalak. Hainbat obra egingo dituzte azpiegitura egonkortu eta, modu horretan, herritarrentzako segurua izan dadin.
Ez dute horretara mugatu nahi: panel batzuk jartzea ere dute buruan, Turismo Planaren barruan. "Panel horiek QR kode batzuk izango dituzte, bisitariak baserriari buruzko informaziora bideratzeko", azaldu du Ander Larrinaga zinegotziak.
Gainera, bide berri bat eraiki da duela gutxi baserriaren albo batean, Zumalakarregi etorbideko etxebizitza berriak eta bertako parkea Goikplaza kalearekin konektatzeko.
Laudioko Udal Gobernu Taldeak proiektu zehatz bat aurkeztu zuen Etxebarria Baserrirako: haur eskola atondu nahi zuen bertan, legeladia amaitu baino lehen. "Baina bidean konturatu gara espazioak behin behineko alternatiba bat behar duela", azaldu du Larrinagak, eta gaineratu du gauza batek ez duela bestea kentzen.
Laudioko ondare elementu esanguratsuenetako bat bilakatu da Etxebarria baserria, XVI. mendeko margolanak topatu baitziren bertan. Euriteek eta eraikinaren egoerak nabarmen hondatu zituzten arrastoak. Horregatik, paretak zutik mantentzeko estruktura jarri zuten, txapazko sabai eta guzti. Estruktura hori egonkortzea izango da aurten egingo dituzten lanen xede nagusia.