Behi batek birritan egin zuen ihes atzo Laudion

Aitor Aspuru Saez 2022ko apirilaren 26a
Deskargatu Info Ahotsak :

Gidari batek grabatu zuen behia A-625 errepideko sarreran.

Udaltzaingoak bideratu behar izan zuen egoera eta jabeari isuna jartzeko prozedura abiatu dute. A-625 errepideko sarreran ibili zen aberea, baita Latiorro auzoan ere.

Atzo behi batek bi aldiz egin zuen ihes Laudioko herrigunean. Zehazki, A-625 errepideko Latiorroko sarreran lortu zuen askatzea birritan. Lehenengo gertakaria arratsaldeko lehen orduetan izan zen eta Laudioko Udaltzaingoak harrapatu zuen animalia, jabearekin batera.

Bigarren ihesaldia, ordea, arratsalde erdian jazo zen eta aberea A-625 errepideko sarreran ibili zen aske. Zenbait gidarik grabatu zuten animalia errepide horretatik igarotzen, Latiorroko bidean. Auzune horretara heldu zen behia.

Udaltzainek ez dute azalpen gehiagorik eman, baina bigarren ihesaldiaren ondorioz, poliziak erabaki du zigor prozedura irekitzea jabearen kontra.

Gertakari gehiago

Behin baino gehiagotan ikusi dira Laudion abereak herrigunetik. Kasu gehienetan hiltegirako bidean zeuden eta arazo berezirik gabe konpondu zuten egoera, adibidez, 2020an edota 2021ean. Beste kasu batean, aldiz, animalia lokartu behar izan zuten dardoen bidez eta muturreko kasuan, 2018an, hain zuzen, Ertzaintzak hil zuen behia.

 

Jendartea Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide