Antonio Oyarzabal pianista laudioarra herrira itzuliko da Gabonetan eta aukera baliatuko du musika emanaldia eskaintzeko abenduaren 26an 19:00etan Kasinoan. Modu horretan prestatuko da 2023rako, zeinean hainbat hitzordu finkatu dituen: martxoan Bilboko Arriaga Antzokian eta Los Angeleseko Californiako Unibertsitatean, Valentzian apirilean, Floridako Tallahaasee Unibertsitatean maiatzean edota Salzburgon uztailean.
Horrez gain, hurrengo urtean disko berria grabatuko du Granadako Manuel de Falla auditorioan, IBS Classic disketxearen eskutik eta emakumezko konposatzaileen lanekin, La Muse Oubliée grabaketaren bidea jarraiki. Hain zuzen, disko horri esker kritika bikainak jaso zituen nazioarteko komunikabide garrantzitsuetan, ez soilik Erresuma Batuan -han bizi da egun-, baita Estatu Batuetan ere.
2022 bizia
Edonola ere, aurrera begira jarri baino lehen, gogoratu beharra dago bukatzear den urtea emankorra izan dela laudioarrarentzat eta bi disko gehiago grabatu dituela Londresen. Alde batetik, Young Musicians Symphony Orchestra-rekin eta, bestetik, Hego Ameriketako emakume konposatzaileen sorkuntzekin.
Inoiz jo ez den pieza
Hain zuzen, emakumezkoen partiturekin egindako lanari esker, Maria Zucca konposatzailearen senideak liluratu dira eta argia ikusi ez duen bere pieza bat eskaini diote, munduko estreinaldia egin dezan.
Bestalde, zuzeneko ugari ere izan ditu aurten, besteak beste, Winbledon eta Peterborougheko Nazioarteko Jaialdietan, Londresen, Las Palmasen edo Pirineos Classic Jaialdian.