Irailaren 20an egingo dute publiko hiruretako zeinek lortuko duen Oscar Sarien lehiaketan egotea. Horretarako kanpaina egitea ezinbestekoa izango du Urresolak hurrengo egunetan. Dena den, Aiaraldeko zuzendariak aurreikuspenak bete ditu dagoeneko.
Zinemagile laudioarrak sekulako mugarria jarri du euskal zineman 20.000 especies de abejas bere lehen film luzearekin. Izan ere, film independenteak 150.000 ikusle baino gehiago erakarri ditu zinemara eta nazioarteko hainbat jaialdiren aitortza jaso du.
Horretarako gai arantzatsua landu du; identitatearen eta adin anitzeko belaunaldien krisialdia adingabe transexual baten bidez.
Urresolaren lanak zinemaren bi mitorekin nor baino nor lehiatzera eraman du. Lehenik eta behin, Victor Erice Karrantzako zinemagilearen film berria izango du aurrez aurre. Zuzendariak ez du ezer grabatu 30 urtez eta Cerrar los ojos izan da bere itzulera.
Ericek txalo zaparrada jaso zuen Canneseko jaialdian eta Donostiako Zinemaldiaren aitortza ere jasoko du irailean, bereak baitira El espíritu de la colmena edota El sol del membrillo pelikula entzutetsuak.
Ericeren zinema intimistaren beste puntan dago Juan Antonio Bayonarena, ekoizpen handiak eta akzioz beterikoak eginda ibilbide izugarria eta meteorikoa bete baitu. Lo imposible, Jurassic World edota El orfanato filmeena ez ezik, Lord of the Rings: The Rings of Power telesaioaren egileetako bat ere bada.