Duela bi urte abiatu zuen Malen Atxa gazteak ibilbide artistikoa, Matx izen artistikoarekin. Bidean hainbat kontzertu eta bost abestiko EPa plazaratu ditu. Orain, hastapenetan mamitutako Su kanta irudiz jantzi du; 2021ean kaleratutako abestiaren bideokliparekin. Ruben Ladron de Gebara bideogilearen laguntzaz sortu du ikus-entzunezko pieza berria, Egoitz Uriarterekin ekoiztutako abestiari dimentsio berri bat eskainiz.
Ekainaren 10ean aurkeztu zuen Matxek bere lehenengo bost kantaz osaturiko EPa: Katarsia. Orduko hartan luze eta zabal mintzatu zen Aiaraldea Komunikabidearekin bere lan artistikoaren inguruan.
Ibil Bedirekin kontzertua
Su abestiarekin egin bezala, hastapenetara itzuliko da Matx datorren azaroaren 18an, Faktoriara, hain zuzen. Izan ere, Malen Atxak bertan eskaini zuen bere lehenengo kontzertua 2021ean. Ez da bakarrik igoko taulara, Cuatro Bancoseko lagunak izango baititu inguruan.
Atxarekin batera, Ibil bedi taldea ere izango da Laudion. Nafarrek 2018an ekin zioten bideari eta honezkero hiru lan luze plazaratu dituzte, azkena aurten bertan; Goldea. Matxek bezala, Ibil Bedik ere lotura estua du Faktoriarekin. 2019an egon ziren lehenego aldiz, egun Faktoira dena pabiloi huts bat zen garaian. 2021ean, pandemia betean, errepikatu egin zuten. Faktoriako talde kuttunaren hirugarren bisita izango da oraingoa.
Sarrerak salgai daude honezkero esteka honetan.