Hasi dira Laudioko anbulatorio berria eraikitzeko lanak

Txabi Alvarado Bañares 2024ko ots. 10a, 10:50
Gunea hesitu eta zuhaitzak kendu dituzte dagoeneko. / Aiaraldea.eus

Altuna y Uria eta Ormak enpresek egingo dute obra, 14,2 milioi euroren truke, eta 22 hilabetetan amaitu beharko dute. 

Hasi dira Laudioko anbulatorio berria eraikitzeko lanak. Latiorro auzoko berdegunea hesitu dute dagoeneko, eta gaur goizean moztu dituzte bertan dauden zuhaitzak, obrei ekin ahal izateko. Altuna y Uria eta Ormak enpresek elkarrekin sortutako aldi baterako enpresa-elkartea arduratuko da proiektua egikaritzeaz, 14,2 milioi euroren truke, eta 22 hilabeteko epea izango du horretarako. 

Altuna y Uria da, hain zuzen, bertatik metro eskasetara antzokia eraikitzen ari den enpresa berdina. Oso ezaguna da Euskal Herrian, hainbat obra publiko esanguratsu egin dituelako 1975tik hona: Leitzarango Autobidea, Eibar-Gasteiz AP-1 autopista, Kursaal eraikina, Zubietako Erraustegia...

Antzokiaren kasuan, gainera, Altuna y Uria izan zen lehiaketara aurkeztu zen enpresa bakarra. Eta bigarren deialdian izan zen hori, lehenengoan ez baitzen enpresa bat bera ere ez aurkeztu. Anbulatorio berriaren kasuan, aldiz, lehia handiagoa egon da, 10 enpresa aurkeztu baitira guztira. 

Gauzak hala, obra-giroa nagusituko da Latiorroko zelai horretan 2025era arte. 

2021eko ekainean jakinarazi zuen Gotzone Sagardui osasun sailburuak Laudioko anbulatorioaren kokalekua zein izango zen. Erabakiak eztabaida sortu zuen herritarren eta hainbat talde politikoren artean. Hala ere, EH Bilduk eta Omniak osatutako udal gobernu berriak itxitzat eman zuen eztabaida hori, gaiari lotutako irakurketa kritikoa plazaratu ostean betiere. EAJ, bere aldetik, poztu egin zen hori entzutean. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide