EH Bilduk ere oharra plazaratu du Omniak udal gobernua uzteko hartutako erabakiaren inguruan. Ezer baino lehen, udal gobernuko taldeak berretsi du elkarlanean jarraituko duela alderdi independentearekin, "adostutako proiektuetan aurrera egiteko". Horrez gain, "errespetu osoa" adierazi dute Alvaro Barrios buru duen taldeak hartu duen erabakiarekiko.
Aurrera begira, EH Bilduko kideek aurreratu dute "gobernantza kooperatiboaren eredua" sustatzen jarraituko dutela, eta "balioa eman" diote legealdiko lehen urtean Omniarekin eginikoari, "hainbat proiektu" aurrera ateratzeko gai izan direla nabarmenduta. "Horregatik, haiekin elkarlanean jarraitzeko konpromisoa mahaigaineratzen dugu. Orain, egoera berri honetan, gogotsu eta arduraz heltzen diogu erronka honi", ziurtatu dute.
Ildo horretan, "Laudioko herritarren bizitzak hobetzeko lanean jarraitzea" da EH Bilduren asmoa, "eredu parte-hartzaileak txertatzen, ezberdinen arteko akordioak lortzeko ahalmenari balioa ematen alderdi ezberdinen arteko elkarlana bultzatuz, udal korporazio eta herritar ororekin batera".
EH Bilduko kideek aurreratu dute "gobernantza kooperatiboaren eredua" sustatzen jarraituko dutela, eta "balioa eman" diote legealdiko lehen urtean Omniarekin eginikoari, "hainbat proiektu" aurrera ateratzeko gai izan direla nabarmenduta.
Bukatzeko, herritarrak erakusten ari diren "babesa eta konfiantza" eskertu dute alderdi subiranistako kideek.
Talde politiko guztien balorazioak
EH Bilduz gain, Udalean ordezkaritza duten gainontzeko talde politikoek ere plazaratu dituzte oharrak Omniak hartutako erabakiaren inguruan. EAJk albistea argitara atera eta ordu gutxira atera zuen bere balorazioa. PSE-EEk berdina egin zuen biharamunean, eta Omniako kideek ere plazaratu zuten oharra hartutako erabakiaren inguruko azalpen gehiago emateko.