Esku hartzeko eskatu dio ELA sindikatuak Euskal Autonomia Erkidegoko Justizia Auzitegiari, premiazko kautelazko neurrien demanda aurkeztuta gaur goizean. Horren bitartez, langile erakundeak ekidin nahi du Guardian taldeak Laudioko lantegia itzaltzea eta erabilgaitz uztea.
Halaber, sindikatuak mezua bidali die Eusko Jaurlaritzari, Industria Sailari eta Lan Sailari, datozen orduetan eragotzi dezaten multinazional amerikarrak labea geldiaraztea.
Berehalako neurriak
Premiazko egitasmo horiek bat datoz Guardian enpresak erakutsitako presarekin. Izan ere, hasiera batean multinazionalak adierazi zuen otsailaren 3an ekingo ziola labea itzaltzeari.
Horrek ekarriko du azpiegitura behin betiko funtzionamenduz kanpo uztea eta, hori ekiditeko, Guardian Llodioko enpresa batzordeak iragarri zuen grebara joko zutela.
Dena den, multinazionalaren zuzendaritzak aurre hartzeko saiakera egin du eta asmoa da urtarrilaren 29an bertan hastea labea amatatzen.
Osalanen txostena
Mobilizazioak eta epaitegiko salaketak ez ezik, langile batzordeak bestelako bideak ere hartu ditu. Esaterako, Osalani eskatu dio txostena egitea labearen itzalketari buruz. Izan ere, langileen aburuz, hori egiteak arriskuan jartzen du eraikina bera eta beharginen segurtasuna.