Segurtasun arduradunik gabe geratu da Laudioko Udala. Jon Agirrebengoak kargu hori uztea erabaki du bere Bilboko udaltzain lanpostura itzuli eta "bertan ireki diren promozio aukerak baliatzeko".
Hala adierazi du tokiko erakundeak prentsara bidalitako oharrean. Bertan azaldu dutenez, Agirrebengoak eszedentzia hartu zuen Laudioko segurtasun arduradun kargua hartzeko, eta hiru hilabete eman ditu zeregin horretan, "Laudioko Udaltzaingoaren gidaritza eredua aztertzen". Denbora tarte horrek aukera eman dio "hasierako diagnostikoa" egiteari heltzeko, "giza baliabide zein azpiegituren aldetik Udaltzaingoan jorratu beharreko lan ildoak zehazte aldera".
Deustuko Udaltzain-etxeko burua zen Jon Agirrebengoak, eta eszendentzia hartu zuen Laudiora joateko. Kargu hori utzita, Bilbora itzuliko da polizia arduraduna.
"Ezusteko erabakia"
Ainize Gastakak aitortu du erabakiak "ezustean" harrapatu duela udal gobernua, eta "atsekabez" egin beharko diotela aurre. Hala ere, alkateak uste du Agirrebengoak hiru hilabetetan eginiko lana "bikaina" dela eta balio izan duela "oso bide-orri baliagarria" zirriborratzeko Udalak aurrera begira dituen zereginei erantzuteko.
Gauzak hala, egoera bideratzeko aukerak aztertzeari ekin dio udal gobernuak. "Udaltzaingo talde egituratu eta egonkor bat osatzea da gure lehentasuna, beti ere Laudiorako gertuko polizia eredu bat oinarri duela”, azaldu du alkateak.
Duela urtebete kargugabetu zuten ordura arte Laudioko Udaltzaingoko buruzagia izandako pertsona, “gertutasunezko polizia lortzera bidean” urratsak ematen hasteko. Orduko hartan, alkateak aldarrikatu zuen “konfiantza eta elkarlana” egon behar direla tokiko poliziaren agintearen muinean eta ordura arte ez zela halakorik egon.
Baina arduradun berria topatzea ez zen erraza izan. Lehen deialdian aukeratutako bi hautagaiek uko egin zioten lanpostuari, "arrazoi pertsonalengatik edota lan baldintzengatik", Udalaren hitzetan. Azkenean, azaroan hartu zuen kargua Jon Agirrebengoa Barturenek, ordura arte Deustuko Udaltzain-etxeko buru zenak.