Aiala Vidrioko langileek gaur egindako bileretan berretsi dute bihar greba mugagabea abiatuko dutela, hamahiru langileren kaleratzearen kontra.
Hain zuzen, enpresak hamahiru behargini -enpresaren barruko espedizio- eta garraio-zerbitzukoei- jakinarazi die euren kontratuak etengo dituela eta Adecco multinazionalaren esku geratuko direla. Honakoa salatu dute enpresa batzordeko kideek: "Hori ez da subrograzioa, hori da hamahiru kaleratze egitea. Izan ere, langile horiek ez dira izango jadanik plantillakoak".
Berez, kontratu aldaketa hori apirilean sartuko da indarrean eta bi aste lehenago jabetu dira beharginak, enpresaren komunikazioa jaso ondoren.
Bestelako bideak
Aiala Vidrioko Enpresa Batzordeak, dena den, aipatu du prest dagoela greba mugagabearen deialdia bertan behera uzteko, baina baldintza argi batekin: neurri hori bertan behera uztea.
Geroz eta langile gutxiago
Vidralaren (Aiala Vidrioren jabea den multinazionalaren) emaitzak positiboak badira ere, enpresak langile kopurua murrizteko erabakiak hartu ditu Laudion. Duela bi urte konpainiak iragarri zuen 90 behargin gutxiagorekin funtzionatuko zuela herrian eta prozesua abiatu zuen dozenaka langilek lanpostuari uko egiteko.