Ferosca Wind enpresak Eusko Jaurlaritzari eskatu dio Laudioko mendietan kokatzea aurreikusita duen Ferosca I parke eolikoa onura publikokoa izendatzea. Horrek esan nahiko Laudioko Udaleko araudia saihesteko aukera izango lukela proiektuak.
Berez, Arabako Foru Aldundiak bere gain hartu zuen zentral eolikoaren Plan Berezia, Laudioko eta Aiarako udalek ezezkoa eman ostean, eta maiatza hasieran ondorioztatu zuen proiektuak indarrean dagoen hirigintza araudia urratzen duela eta gabezia horiek ezin direla konpondu. Hortaz, plana ezeztatu du foru erakundeak.
Horren aurrean, helegitea aurkeztuko zuela adierazi zuen Fernando Valldeperesek, konpainiaren CEOak. Bere ustez, 1995eko HAPOko araudiak ez litzateke arrazoi bat izan beharko proiektu eolikoak gelditzeko, garai horretan ez baitziren existitzen energia berriztagarriak bultzatzeko ekimenak.
Orain, Eusko Jaurlaritzari eskatu dio onura publikokotzat jotzea proiektu eolikoa eta astearte honetan argitaratutako Euskal Herriko Agintaritzaren Aldizkarian zehaztu dutenez, makinen potentzia unitarioari eragingo dioten moldaketak ere aurkeztu ditu Feroscak.
Hain zuzen ere, potentzia hori 4,5 MWtik 7 MWra igotzea izango litzateke aldaketa, aerosorgailuen abatzaren altuera eta errotorearen diametroa aldatu gabe. Aldaketak ez luke ingurumen-inpaktuaren ebaluaziorik beharko eta hiru aerosorgailuz osatutako parke eolikoak (sei izatea zen enpresaren hasierako asmoa baina Jaurlaritzak horietako hiru debekatu zituen) 21 MWko potentzia izango luke horrela.