Herritarrek eta Aiaraldeko Mendiak Bizirik plataformak poztasuna adierazi diote Aiaraldea Komunikabideari, Mendi, Ferosca I eta Larragorriko proiektu eolikoek administrazioen ezezkoa jaso baitute.
Aiarako Udalak azaldu du Arabako Foru Aldundiak ukatu egin duela lurzoru urbanizaezineko Mendi zentral eolikoaren Plan Bereziaren hasierako onarpena.
Aiararen kasuan, azpiegitura elektrikoak jarri behar zituen enpresak Murga eta Luiaondoko kontzejuetan, komunitatearen ekipamenduko zonetan, tren-geltokian eta baita Nerbioi ibaiaren arroan ere.
Ferosca I egitasmo eolikoaren kasuan, Arabako Foru Aldundiak ondorioztatu du zentral eolikoaren Plan Bereziak indarrean dagoen hirigintza araudia urratzen duela eta gabezia horiek ezin direla konpondu. Gauzak horrela, plana ezeztatu du.
Larragorriren kontrako epaia
Larragorriko proiektu eolikoari dagokionez, Green Capital enpresak helegitea jarri zuen Administrazioarekiko Epaitegian Laudioko Udalaren kontra. Izan ere, tokiko erakundeak ez zion baimendu dorre anemometrikoa instalatzea Goikolandetan.
Epaitegiak adierazi du eremu hori urbanizaezina dela eta paisaiaren babesa ere baduela. Epaileek argitu dute azpiegitura behin-behinekoa izateak ez duela aldatzen lurralde horren sailkapena.
Solaria ere
Solaria enpresak dituen proiektu ugariren artean, egin nahi zuen ebakuazio elektrikoko linearen baimena iraungi da. Kasu horretan Luiaondo, Murga, Arespalditza eta Zuhatzako kontzejuei eragiten zien, Solaria-Zierbena Solar 3ko sarbide eta konexioa. Zehazki, ez du bete ingurumen-inpaktua lortzeko epea.
Aiarako Udalak azpimarratu du hiru aldiz aurkeztu zituela errekurtsoak horren kontra.