Hiru urteren ostean, Laudioko jaietara itzuliko dira berriz adingabeentzako entzierroak. Azken hiru urteetan ezin izan dira mota horretako ekintzak antolatu Euskal Autonomia Erkidegoan, 2022ko abuztuan argitaratutako lege baten ondorioz.
Gauzak hala, ur-zezenen entzierroak antolatzera pasa zen Udala, adigabeentzako alternatiba gisa, baina horrek ez zuen eztabaida itzali. Urte horretako jaien azken egunean haur talde batek protesta egin zuen, "Kartoizko bakillak ez!" lemapean. Ordutik hona eztabaida puntualki azaleratu da.
Legebiltzarrean ekainean onartutako lege-erreformak aukera ematen du zortzi urtetik gorako adingabeentzako entzierroak antolatzeko.
Iragan ekainean, aldiz, legearen erreforma onartu zen Eusko Legebiltzarrean, EAJ eta PSE-EEren ekimenez. Moldaketa horrek baimena ematen du zortzi urtetik gorako adingabeentzako entzierroak antolatzeko. PP eta Vox-en alde lerratu ziren bozketan, EH Bildu abstenitu egin zen eta Sumar aurka azaldu zen.
Erreforma hori eginda, Udalera igaro da berriz pilota, eta honek astelehenean eskainitako prentsaurrekoan jakinarazi zuen jarduera hori sanrokeetako egitaraura itzuliko zela.
Hesiak, prest dagoeneko
Hilabete bat falta da oraindik Laudioko jaiak hasteko, baina dagoeneko muntatuta dago Lamuza plaza Laudioaldeko aparkalekuarekin lotzen duen hesi ibilbidea. Udal langileen opor egutegiak daude tamainako aurreikuspenaren atzean, Udalak Aiaraldea Komunikabideari adierazi dionez.
Jaietako zortzi egunetatik bostetan egongo dira entzierroak, abuztuaren 16, 17, 28, 19 eta 30ean. 11:00etan izango dira haur eta nerabeei bideratutakoak, eta 12:30ean 16 urtetik gorakoentzat antolatutakoak.
