Udala arduratu da aurtengo San Roman eta San Bartolome Jaien egitarauak osatzeaz. Ohiko egitura mantenduko dute bi festek: abuztuaren 5etik 9ra ospatuko dira San Romangoak eta 23tik 26ra, aldiz, San Bartolomekoak. Lau eta lau = zortzi egun guztira monotonia albo batera utzi eta herria festa giroz betetzeko.
Ez dira faltako jada herriaren tradizioaren parte bilakatu diren ekintzak: paella eta mozorro lehiaketak, bolo-jokoa, makila jaurtiketa, txu txu trena edota sagardotegi formatuko afaria, besteak beste. Baina egongo dira baita hainbat ekintza berri, Araiako Umore Jaialdiaren antzerki emanaldia kasu.
Musika eskaintza
Inguruko herriekin alderatuta, esan daiteke berezia dela Okondoko Jaietako musika eskaintza. Egunez eta familiartean gozatzeko kontzertuak dira nagusi. “Floren y sus muchachos” eta “La Ribera Canta” taldeak arduratuko dira San Roman jaiak alaitzeaz, abuztuaren 9ko gauean egongo den disko-festarekin batera.
San Bartolometan, aldiz, hiru talde igoko dira oholtzara: Alai berbena -abuztuaren 23an-, Xaibor -24an- eta Party Man -25ean-.
Berdintasunaren alde
Udaletik jakinarazi dute hainbat ekimen egingo dituztela jaietan “berdintasuna sustatu” eta “eraso sexistak ekiditeko”. “Parte hartze parekidea” edota “rol eta estereotipoen aldaketa” sustatzeko irizpideak proposatu dituzte horretarako.
Jai programa izango da horren isla: hizkuntza ez-sexista eta irudi inklusiboak izango ditu. Hortaz gain, musika ez-sexista banatu dute herriko tabernetatik. Eskumuturreko eta amantal moreak banatuko dituzte, azken hauek Tortilla Txapelketan.
Irailaren 24an morez jantziko da jai egitaraua: 11:30ean “jai parekideen aldeko kalejira eta mokadua” egingo dira eta Emakumeen Bolo Txapelketa, aldiz, 18:00etan.
