Inkontzienteki bizi dira hedabideetako mikromatxismo gehienak, Kaitin Allende Zaldunbide Okondoko bizilagunaren ustez: "Emakumezkoa albiste da eskeletan agertzen denean, orduan doa lerroburuetara, zereginik ez dagoenean. Hedabideetako azaletan ez gara agertzen, ezta kontrazaletan ere, nahiz eta gehiengoa izan".
Urteak daramatza kazetari lanetan esatariak. "Zergatik dakigu kazetari arabiarra akatu dutela, eta ez Bulgariako neska kazetari bat bortxatu eta erail dutela? Zer kirol lantzen da hedabideetan? Beti gizonezkoen futbola. Inoiz eten al da programazioa 3-4 minutuko tartea eskaintzeko neska futbolariei? Emakumeak futbolean, karatean edo sokatiran munduko onenak izanda ere, eurei bost", azpimarratu du.
Tratuan ere nabari ditu botere harremanak, "zer eta nola esaten diguten, mikromatxismo moduan har daiteke". Bitxikeri gisa, martxoaren 8ko greba feminista aipatu du: "Irratian gehienak emakumeak gara, eta guardian zeuden editoreek momentu txarra bizi izan zuten. Hor ikusi zen gure gremioan ez dela baloratzen gure lana 'momentu kritikoak' iritsi arte".
Okondoarrak dio gauza asko aldatu beharko liratekeela informazioaren ekoizpen sisteman. "Kazetaritza 24 orduko lana da, albisteak ez baitira eteten. Beraz, ordutegia moldatzeko edo murrizteko eskaera eginez gero, beti daude trabak: gaur eguna libre duenak, biharamunean lan bikoitza du".
Kazetarien artean asko dute ikasteko, Allende Zaldunbideren iritziz: "Gure esku dagoen guztia eginez gero, akaso, pauso txikiak eginda lortuko dugu zeozer; esaterako, Bilboko Nerbioiko itsasadarrena gabarra ateratzea neskek irabazi dutelako". Zaila bezain erraza da, bere hitzetan. Emakumeen lan edo lorpenak ez badira aitortzen, kazetarien artean aliatu beharko liratekeela pentsatzen du: "Aizu, ez dugu gai hori azalera eraman? Bakoitzari bere balioa ematea eskatzea ez da asko, baina bide erdia da".
