Otsailaren 20an izango du Aratz Garmendia hurrengo borroka debuta, urte eta erdiko etenaldia burutu eta gero. Donostian izango da, K1 profesionalen arteko lehian. Bi euskal herritar arituko dira nor baino nor: Aratz Garmendia eta Maikel Cardenas. Okondoko bizilagunak sare sozialetan aipatu duenez, "urte eta erdi ostean arazo guztiak gaindituta" itzuliko da. Zentzu horretan, lagun izan dituen denei bidali die mezua: "Eskerrik asko posible egin duzuen guztiei".
Aratz Garmendiaren 248. borroka saioa izango da Donostiakoa, eta horietatik 60 baino ez ditu galdu. COVID-19 birusak eragindako pandemia dela eta, ezingo da ikuslerik egon ekitaldia zuzenean jarraitzen.
Garmendiaz gain, Aiaraldeko beste zenbait borrokalari ere igoko dira ringera: Jagoba Pazos, Leire Torres eta Ibai Ruiz, besteak beste.
Aratz Garmendiaren kirol ibilbideak marka asko hautsi ditu. 2017an, esaterako, Jose Luis Zapater "Titin" garaitu zuen, Espainiako borrokalari ezaguna:
Ibilbide oparoa
MMA eta K1 diziplinetan aritu izan da Garmendia batik bat. Euskal Herrian zein hemendik kanpo arrakasta handia izan du bere ibilbidean, Be Mad TV telebista kateak bere saio bat emititu izana da horren adierazle. 2017an Londresen izan zen munduko borrokalari onenekin entrenatzen, eta 2018an Europako Boxeo Txapelketako finala irekitzeko borrokaldian hartu zuen parte.
Eskualdean ere jaso izan du aitortza kirolariak. 2018an Okondoko Txakolin Eguneko pregoilari izendatu zuten. Bideo honetan laburtu dituzte 'Kamikaze' ezizenarekin ezaguna den aiaraldearraren une onenak: