Naia Landaluze Athletic Clubeko lehen taldeko jokalaria da. Izan ere, klubak ez du momentuz fitxaketarik egin eta dituen aurpegi berriak filialeko jokalariak dira. Asteazkenean azterketa medikua egin ostean, gaur izango du bere lehenengo entrenamendua Iraia Iturregi entrenatzailearekin.
Lezaman izango da lehen saioa, bigarren zenbakiko zelaian, eta irekia izango da, jarraitzaileek ikusle gisa parte har dezaten.
Landaluzek debuta egin zuen talde zurigorrian 2020/2021 denboraldian, ekainaren 26an, FC Barcelonaren kontra, eta pasa den denboraldian Reto Iberdrola txapelketa jokatu zuen. Hiru partida kenduta, orozkoarrak norgehiagoka guztiak lehiatu zituen eta Athletic Clubak berak bere abiadura eta aire jokoa goraipatu ditu, baita pasa den denboraldian lau gol egin zituela ere.
Bizkaiko klubeko elitera heldu baino lehen, Landaluzek ibilbide luzea egin du, nahiz eta gaztea izan. Berez, 2016an hasi zen bere harremana Athletic Clubarekin, teknifikazio saioetan parte hartzeko gonbidatu baitzuten. Hala ere, 2019an Estatu Batuetara jo zuen, Kentuckyra. Han beka lortu zuen ikasteko eta futbolean jokatzeko.
Dena den, pandemiaren ondorioz, Euskal Herrian geratzea erabaki zuen orozkoarrak, Campbellsvilleko bekari uko eginda.