🔴 AMURRIOKO UDALAK DIRU-LAGUNTZA KENDU DIO ESKUALDEKO EUSKARAZKO KOMUNIKABIDE BAKARRARI 🔴
📝 Eman atxikimendua eta babesa Aiaraldea Komunikabideari, hemen sinatuta 👇
www.labur.eus/amurrioneuskarazbizinahidugu
📍 Ekainak 21, ostirala, AGERRALDI HERRITARRA Amurrioko Juan Urrutia plazan, 19:30ean.
Atzo sinatu zuten ofizialki Athletic Clubak eta Naia Landaluzek azken honen kontratuaren luzapena 2026ko ekainera arte. Orozkoko defentsak adierazi dio Aiaraldea Komunikabideari poztasunez hartu duela proposamena, bere ametsetako taldea baita Ibaiganeko kluba, umea zenetik.
Athletic Clubak azpimarratu duenez, Landaluzek minutu ugari jokatu ditu 2023/2024 denboraldian: "Elitean finkatu den jokalaria da Liga F-ko 28 partida eta Kopako bost jokatuz, 2.000 minutu baino gehiago lehiatuta. Gainera, bi golen ekarpenarekin, David Aznarren taldeak aurten erakutsitako bilakaeran lagundu du".
Jokalaria iritzi berekoa da eta ziurtatu du bukatu berri den denboraldian asko hobetu duela eta konfiantza irabazi duela. "Denboraldi hau oso polita izan da, eta espero dut hurrengoak ere izatea", esan du orozkoarrak.
Orozkoko atzelariak 2021eko ekainean egin zuen debuta FC Barcelonaren aurka, Iraia Iturregiren eskutik, eta 2022/23 denboralditik aurrera, lehen taldearen fitxa lortu eta minutu gehiago jokatzen hasi da.
Bizkaiko klubeko elitera heldu baino lehen, Landaluzek ibilbide luzea egin du, nahiz eta gaztea izan. Altzarraten aritu zen eta, berez, 2016an hasi zen bere harremana Athletic Clubarekin, teknifikazio saioetan parte hartzeko gonbidatu baitzuten.
Hala ere, 2019an Estatu Batuetara jo zuen, Kentuckyra. Han beka lortu zuen ingeniaritza ikasteko eta futbolean jokatzeko. Dena den, pandemiaren ondorioz, Euskal Herrian finkatzea erabaki zuen, Campbellsvilleko bekari uko eginda.