Arratsaldeko zazpiak puntuan entzun dira txistu eta danbolin hotsak Orozkoko udaletxeko balkoitik, eta horien atzetik atera da Zipotz. Bere gorputza osatzen duten izaren artetik agertu da orduan Ander Martinez Perurena.“Burruzkale 9n jaiotako bi arima euskaltzale eta irrifarretsuak” bilakatu dira orduan uneko protagonistak.
Urteetan zehar "bizilagunengandik jasotako energia lau haizetara zabaltzeko" prest hartu dute mikroa, eta gozamena eta askatasuna erdigunean jarri dituen berbaldia eskaini diete orozkoarrei. Norbere identitatea eta sexu orientazioa aske bizitzearen aldeko mezu sendoa helarazi dute balkoitik eta Orozko erasorik gabeko herria izan nahi duela ere argi utzi nahi izan dute.
Aldarrikapenez gain, esker hitzak ere partekatu dituzte, familiarekin lehenbizi, eta baita euskara eta jai herrikoiak bizirik mantentzen dituzten lagun guztiekin ere. Gaur Orozkon egon ezin izan duten herritar horiek ere oroitu dituzte Anderrek eta Zipotzek, eta bereziki, berriki zendutako Jabi Manzarbeitia izan dute gogoan.
Zipotz txontxongilo erraldoiak 2004an jaio zenetik izandako bidelagunetako batzuk gonbidatu nahi izan ditu gaur, eta trikiti eta pandero soinuez lagunduta, Araiko eta Areatzako erraldoiek hartu dute Orozkoko plaza. Suziria jaurti bezain pronto abiatu dira denak kalejiran, Orozkoko buruhandiez lagunduta. Festa piztu da orduan herrian, sei egunez luzatzeko prest.