Ivan Fandiñoren omenez eskultura jartzeko laguntza eskatu du Otxomaio elkarteak

Urduñarrak Ivan Fandiñoren omenaldia antolatzen ari dira. Otxomaio zezen-taldeak aditzera eman duenez, eragile ugari batu dira dinamikara dagoeneko.

Elkarlanean daude, besteak beste, Santa Zezilia musika banda, Getxa Goi txistulari taldea, Urduñako abesbatza, Parrokiako korala, Erauntsi dantza taldea, Amigos del Caballo elkartea edota Pelotazale elkartea.

Ivan Fandiñoren eskultura
Egitarauari dagokionez, egunak baino ez dituzte zehaztu: "9 egunez kultur ekitalditan zentratuko gara. Apirilaren 28tik maiatzaren 6ra hainbat kultura eta kirol jarduera egongo dira".

Horien artean kokatu dituzte kontzertuak, dantzak, pilota partidak, zaldi erakustaldia eta zezenketak.

Horrez gain, Ivan Fandiñoren ibilbidea gogoratzeko erakusketa atonduko dute, pilotaria eta txistularia izan baitzen, toreatzaile gisa munduan barrena aritu aurretik. Urduña ezagutzera emateagatik izendatu zuten 2015eko otxomaioetako pregoilari.

Herritarrei laguntzeko deia
Otxomaio klubaren hitzetan, hainbat artistekin jarri dira harremanetan Fandiñoren irudia Urduñako toki esanguratsuren batean ipintzeko, "hiriko ondare gisa".

Proiektuaren gastuak handiak direla eta, herritarrei laguntza ekonomikoa emateko eskatu diete. Hain zuzen, bankuko korronte zenbakia jarri dute eskura, bakoitzak nahi duen ekarpena egin dezan: ES35 0182 1203 1002 0153 9639.

Ildo beretik, bi euroren truke eskumuturreko-oroigarria erosi ahalko da zenbait establezimendutan, ekimena finantzatzeko.

Ekainaren 17an zendu zen Ivan Fandiño (1980, Urduña) Frantziako Aire Sur l'Adour herrian, zezenketa batean jasotako adarkadaren ondorioz. Otxomaio elkartearen aburuz, Urduña zezenketen mapa kokatu zuen, Madrileko Las Ventas plazan edo Ameriketan kasu. "Urduñaren izena beti eramaten zuen zihoan tokira. Hori guztiagatik hiriak gure enbaxadore zintzoari omenaldia eskaini nahi dio hainbat ekitaldi antolatuz, herriak luzaro oroi dezan".