Asier Castilla Pikazak denboraldiko lehen garaipena lortu zuen atzo Muxikan, San Roman sarian. Lasterketa ez zen erraza izan, eta urduñarrak Aiaraldea Komunikabideari azaldu dionez, proba oso bizia izan zen.
Bost bira egin behar zituzten zirkuitu berean, Mendatako mendi atea igota, hain zuzen. Bigarren biran tropela bitan zatitu zen eta azken birarako Asier Castilla Pikazak bazituen zenbait etxeko lan eginda, mendiko saria etengabe borrokatu baitzuen.
Edonola ere, azken igoeran -aldapan bukatu zen lasterketan- talde indartsuenetako txirrindulari finenak zeuden buruan, bost guztira. Asier Castilla Pikazak eta beste batek ekin zioten ihesaldiari, baina koordinazioa galdu ondoren, beste batek harrapatu zituen eta aldi berean, gora jo zuen.
SAN ROMAN SARIA 2024 | LEHENDAKARI TXAPELKETA | MUXIKA
— Txirrindulariak (@Txirrindulariak) August 2, 2024
1 Asier Castilla (@LABORALkTeam )
2 Maxime Diribarne (@EquipoGomur )
3 Pablo Ara (@TelcOnClimaOses )
4 Hugo Tapiz (@EqFinisher )
5 Max Gunson Williamson (IDP)
📽️ https://t.co/VrS3bStMtt pic.twitter.com/v8rPjkSUip
Urduñarrak ez zuen bistaz galdu arerioa eta bere atzean jarri zen, azken metroetan esprintean irabazteko.
Denboraldi gogorra
Duela bi aste igo zen Laboral Kutxako txirrindularia lehen aldiz podiumera denboraldi honetan, Gatzago proban hirugarren izan eta gero. Edonola ere, ez da bolada onena izaten ari berarentzat.
"Oso ondo prestatu nuen neguan nire burua. Entrenamendu gogorrekin, baina hasi eta gutxira, martxoan, bi erorketa izan nituen. Gero lesio bat izan nuen maiatzean. Azkenean, uztailera arte ez dut sasoia berreskuratu eta orain indartsu nabil berriro", aitortu du Asierrek.
Urduñarraren ibilbidea luzea da, nahiz eta gaztea izan. Kategoria anitzetan hainbat lorpenen protagonista izan da, podiumak zapaldu ditu, Arabako txapelduna izan da, Espainiako Txapelketetan parte hartu du... Eta ez da ahaztu behar bere amamarekin harreman berezia duela txirrindularitzari esker.